સુરતની કોર્ટે વર્ષ 2017માં વડોદરાની શ્રાવિકા યુવતી પર દુષ્કર્મ આચરવાના કેસમાં જૈન મુનિ શાંતિસાગરને દોષિત ઠેરવ્યા છે. આ કેસમાં આવતીકાલે સજા સંભળાવવામાં આવશે.

વર્ષ 2017માં વડોદરાની એક શ્રાવિકા યુવતીને ધાર્મિક વિધિ માટે સુરતના નાનપુરા સ્થિત ટીમલિયાવાડ ખાતે આવેલા મહાવીર દિગંબર જૈન મંદિર ઉપાશ્રયમાં બોલાવવામાં આવી હતી. જ્યાં જૈન મુનિ શાંતિસાગરે યુવતી પર દુષ્કર્મ આચર્યું હતું. આ ઘટના બાદ યુવતીએ અઠવા પોલીસ સ્ટેશનમાં ફરિયાદ નોંધાવી હતી, જેના આધારે પોલીસે જૈન મુનિની ધરપકડ કરી હતી.

આ હતી ઘટના ?

કેસની વિગત મુજબ ટીમલિયાવાડ ખાતેના જૈન ઉપાશ્રયમાં આવેલા એક રૂમમાં ધાર્મિક વિધિના બહાને વડોદરાની યુવતીને બોલાવવામાં આવી હતી અને જૈન મુનિ એવા આરોપી શાંતિસાગરે તેના પર પાશવી બળાત્કાર ગુજાર્યો હતો. આ અંગેની ફરિયાદ યુવતીએ અઠવાલાઇન્સ પોલીસ મથકમાં નોંધાવતાં આરોપી શાંતિસગારની ધરપકડ કરવામાં આવી હતી. સેશન્સ કોર્ટ અને હાઇકોર્ટમાં જામીન અરજી નામંજૂર થયા બાદ આ કેસની ટ્રાયલ શરૂ થઈ હતી.