અમદાવાદમાં આજે વહેલી સવારે એસપી રિંગ રોડ પર ગમખ્વાર અકસ્માત થયો હતો. ટ્રકે બાઈકને ટક્કર મારી વૃદ્ધ દંપતીને 50 ફૂટ જેટલા ઢસડ્યા હતા. આથી રોડ પર લોહીના રેગાડા થયા હતા. આ ઘટનામાં વૃદ્ધ દંપતીનું ઘટનાસ્થળે જ કમકમાટીભર્યું મોત નીપજ્યું છે. અકસ્માત એટલો ભયંકર હતો કે વૃદ્ધ દંપતીના શરીરના ચીંથરા ઊડી ગયા હતા. આથી એકત્ર થયેલા લોકોમાં અરેરાટી મચી ગઈ હતી. 

પરિવાર ગમગીનીનો માહોલ

એસપી રિંગ રોડ પર થયેલા અકસ્માતમાં બે નિર્દોષનાં મોત થતાં તેમના પરિવારમાં ગમગીનીનો માહોલ છવાઈ ગયો છે. કચડાયેલાં માનવ અંગોને સ્થળ પરથી ખસેડવામાં આવી રહ્યાં છે, જ્યારે મૃતદેહને પોસ્ટમોર્ટમ માટે મોકલવાની પ્રક્રિયા હાથ ધરવામાં આવી છે. ટ્રાફિક પોલીસ દ્વારા આ અંગે કાર્યવાહી કરવામાં આવી રહી છે.

ટ્રકની ટક્કરથી બાઈક સાથે દંપતી ઢસડાયું

એસપી રિંગ રોડના પાંજરાપોળ ચાર રસ્તા પાસેથી બાઈક પર પસાર થતાં સમયે કાંતિભાઈ રવજીભાઈ પટેલ આશરે (ઉં.વ. 62) અને દક્ષાબેન કાંતિભાઈ પટેલ (ઉં.વ. 60)ને ટ્રકે અડફેટે લીધા હતાં. મંદિરે દર્શન કરીને ઘરે પરત ફરતા સમયે દંપતી પર ટ્રકનું ટાયર ફરી વળતા શરીરનાં ચીથરાં ઊડી ગયાં હતાં. ઘટનાની જાણ થતાં રામોલ પોલીસ અને આઈ ડિવિઝન પોલીસ સ્થળે દોડી ગઈ હતી.