અમરેલીના લાઠી તાલુકાના લુવારિયા ગામે એક દર્દનાક ઘટના સામે આવી છે. ગઈકાલે મોડીરાત્રે સિંહે 22 વર્ષના યુવાન પર હુમલો કર્યો હતો. ગંભીર ઈજા પહોંચતા યુવકનું મોત નીપજ્યું છે. યુવકના મૃતદેહને પીએમ માટે હોસ્પિટલ ખસેડવામાં આવ્યો હતો. જ્યાં પીએમ કર્યા બાદ મૃતકની અંતિમવિધિ વહેલી સવારે કરી દેવામાં આવી હતી. સ્થાનિક વન વિભાગના અધિકારીઓ જાણતા હોવા છતાં કોઈ કાર્યવાહી નહીં કરતા વનવિભાગની કામગીરી સામે સવાલો ઉઠ્યા છે.

અલગ અલગ ટીમો દ્વારા તપાસનો ધમધમાટ શરૂ કર્યો

મળતી માહિતી પ્રમાણે  લુવારીયા ગામમાં સિંહોની અવરજવર વધી છે. સ્થાનિક લોકોના જણાવ્યા મુજબ, મોડીરાત્રે સિંહ દર્શન દરમિયાન આ ઘટના બની છે. મૃતક યુવાનનું નામ  અરદીપભાઈ જસ્ફુભાઈ ખુમાણ (ઉં.વ. 22) હોવાનું સામે આવ્યું છે. આ ઘટનાને લઈને વનવિભાગની અલગ અલગ ટીમો દ્વારા તપાસનો ધમધમાટ શરૂ કર્યો છે. હાલ ઉચ્ચ અધિકારીઓ આ અંગે તપાસ કરી રહ્યા છે