અમેરિકાના રાષ્ટ્રપતિ ડોનાલ્ડ ટ્રમ્પે આખરે પારસ્પરિક ટેરિફની જાહેરાત કરી છે. તેમણે ૧૮૫ દેશોમાંથી આવતા માલ પર ટેરિફ લાદ્યા છે. આ અમેરિકાના ઇતિહાસમાં સૌથી મોટા ટેરિફ છે. અમેરિકાને આનાથી દર વર્ષે 600 બિલિયન ડોલરની કમાણી થવાની અપેક્ષા છે. ભારતે હવે અમેરિકામાં પોતાનો માલ મોકલવા પર 26 ટકા ટેક્સ ચૂકવવો પડશે. અન્ય દેશો પર પણ આવા જ કર લાદવામાં આવશે. ટેરિફની જાહેરાત કરતા ટ્રમ્પે કહ્યું કે આ અમેરિકા માટે 'મુક્તિ દિવસ' છે, જેની લાંબા સમયથી રાહ જોવાતી હતી.

રાષ્ટ્રપતિ ટ્રમ્પ કહે છે કે કેટલાક દેશો અન્યાયી રીતે વ્યવસાય કરી રહ્યા છે, તેથી આ ટેરિફ લાદવામાં આવ્યા છે. આ ટેરિફ એવા દેશો પર લાદવામાં આવશે જે અમેરિકાથી આવતા માલ પર વધુ ટેક્સ લાદે છે. ચીન પર ૩૪ ટકા ટેરિફ લાદવામાં આવ્યો છે. જે અગાઉ લાદવામાં આવેલા 20 ટકા ઉપરાંત છે. આ રીતે, ચીનને 54 ટકા ટેરિફ ચૂકવવો પડશે. ચીન અમેરિકાનો બીજો સૌથી મોટો વેપારી ભાગીદાર છે.

ચીન અમેરિકા પર 67 ટકા ટેરિફ વસૂલ કરે છે, પરંતુ હવે અમેરિકાએ 34 ટકા ટેરિફ લાદવાની જાહેરાત કરી છે. તાઇવાન અમેરિકા પાસેથી 64 ટકા ટેરિફ વસૂલ કરે છે, હવે અમેરિકા 32 ટકા ટેરિફ લાદશે. જાપાન અમેરિકા પાસેથી 46 ટકા ટેરિફ વસૂલ કરે છે, અને હવે અમેરિકાએ 24 ટકા ટેરિફ લાદવાની તૈયારી કરી છે. સ્વિટ્ઝર્લૅન્ડ અમેરિકા પાસેથી 61 ટકા ટેરિફ વસૂલ કરે છે, હવે અમેરિકા પણ 31 ટકા ટેરિફ વસૂલશે. ઇઝરાયલ અમેરિકા પાસેથી ૩૩ ટકા ટેરિફ વસૂલ કરે છે, હવે અમેરિકા ૧૭ ટકા ટેરિફ લાદશે. પાકિસ્તાન અમેરિકા પાસેથી ૫૮ ટકા ટેરિફ વસૂલ કરે છે, અને હવે અમેરિકાએ ૨૯ ટકા ટેરિફ લાદવાની જાહેરાત કરી છે. બાંગ્લાદેશ: અમેરિકા પાસેથી ૭૪ ટકા ટેરિફ વસૂલ કરે છે, હવે અમેરિકા ૩૭ ટકા ટેરિફ લાદવા જઈ રહ્યું છે. જયારે થાઇલેન્ડ અમેરિકા પાસેથી ૭૨ ટકા ટેરિફ વસૂલ કરે છે, હવે અમેરિકા ૩૬ ટકા ટેરિફ લાદશે.

ભારત સરકારના એક વરિષ્ઠ અધિકારીએ જણાવ્યું હતું કે અમેરિકા દ્વારા લાદવામાં આવેલા 26 ટકા પારસ્પરિક ટેરિફની ભારત પરની અસરનું વિશ્લેષણ કરવામાં આવી રહ્યું છે. વાણિજ્ય મંત્રાલય તેનું વિશ્લેષણ કરી રહ્યું છે. તેમણે કહ્યું કે અમેરિકામાં થતી તમામ પ્રકારની આયાત પર 5 એપ્રિલથી સાર્વત્રિક 10 ટકા ટેરિફ લાગુ થશે, જ્યારે બાકીનો 16 ટકા ટેરિફ 10 એપ્રિલથી લાગુ થશે. તેમણે કહ્યું કે તેમાં એવી જોગવાઈ છે કે જો કોઈ દેશ અમેરિકા સમક્ષ ટેરિફ સંબંધિત ચિંતાઓ ઉઠાવે છે, તો ટ્રમ્પ વહીવટીતંત્ર તે દેશ પર ટેરિફ દર ઘટાડવાનું વિચારી શકે છે. 

ટ્રમ્પે આ ટેરિફને રાહતભર્યો ટેરિફ કહીને વાટાઘાટોના માર્ગો ખુલ્લા રાખ્યા છે. ભારત પર ૫૨ ટકાના બદલે ૨૬ ટકા ટેરિફ લાદવામાં આવ્યો છે. આ સાથે, ટ્રમ્પે ભારત સાથે વાતચીતની શક્યતા ખુલ્લી રાખી છે. બંને દેશો સતત એકબીજાના સંપર્કમાં છે.

મોદી મારા સારા મિત્ર પણ, યોગ્ય વ્યવહાર નહિ, અમે અડધો ટેરીફ લગાવીશું જ: ટ્રમ્પ 

રાષ્ટ્રપતિ ટ્રમ્પે રોઝ ગાર્ડનમાં મેક અમેરિકન વેલ્થી અગેઇન કાર્યક્રમમાં કહ્યું. ભારત ખૂબ જ સખત છે પ્રધાનમંત્રી મોદી હમણાં જ આવ્યા હતા અને મારા ખૂબ સારા મિત્ર છે, પણ આપણી સાથે યોગ્ય વ્યવહાર નથી કરી રહ્યા. તેઓ આપણી પાસેથી ૫૨ ટકા ચાર્જ લે છે અને આપણે તેમની પાસેથી લગભગ કોઈ ચાર્જ નહીં. ૨૦૨૪માં ભારત અને અમેરિકા વચ્ચે ૧૨૪ અબજ ડોલરનો વેપાર થયો હતો. ભારતે અમેરિકાને ૮૧ અબજ ડોલરનો માલ વેચ્યો હતો, જ્યારે અમેરિકા પાસેથી ૪૪ અબજ ડોલરનો માલ ખરીદ્યો હતો. આ રીતે, ભારતને 37 બિલિયન ડોલરનો ફાયદો થયો. અહેવાલો અનુસાર, ભારત અમેરિકાથી આવતા 23 બિલિયન ડોલરના માલ પરના કર ઘટાડવા તૈયાર છે. આ એક મોટી છૂટ હશે.

અમેરિકા અને એશિયાના શેરબજારો તૂટ્યા 

ડોનાલ્ડ ટ્રમ્પ દ્વારા પારસ્પરિક ટેરિફ લાદવાની જાહેરાતની અસર વિશ્વભરના શેરબજારોમાં અનુભવાઈ. યુએસ ડોલર વેપારમાં અડધો ટકા ઘટીને 103.8 પર આવી ગયો. ટેરિફ વધારાની જાહેરાત બાદ એશિયન બજારો અને યુએસ ફ્યુચર્સ બજારોમાં ઘટાડો થયો હતો. અહેવાલ મુજબ ટોક્યોનો નિક્કી 225 ઇન્ડેક્સ શરૂઆતમાં 4 ટકાથી વધુ ઘટ્યો હતો. તે 2.9 ટકા ઘટીને 34,675.97 પર આવ્યો. ટ્રમ્પે કહ્યું કે તેઓ યુનાઇટેડ સ્ટેટ્સના સૌથી નજીકના સાથીઓમાંના એક જાપાન પર 24 ટકા પારસ્પરિક ટેરિફ લાદી રહ્યા છે. નાઇકી, એપલ અને ટેસ્લાના શેર લગભગ 7 ટકા ઘટ્યા.

ભારત પર અડધો ટેરીફ લાદીને પણ વાટાઘાટો માટે દ્વાર ખુલ્લા 

ડોનાલ્ડ ટ્રમ્પે ભારત પર 52 ટકાના બદલે 26 ટકા ટેરિફ લાદીને વાતચીતની શક્યતા ખુલ્લી રાખી છે. ભારત પહેલાથી જ અમેરિકા સાથે દ્વિપક્ષીય વેપાર કરાર પર વાટાઘાટો કરી રહ્યું છે. બંને દેશોનો ઉદ્દેશ્ય આ વર્ષે સપ્ટેમ્બર-ઓક્ટોબર સુધીમાં આ કરારના પ્રથમ તબક્કાને અંતિમ સ્વરૂપ આપવાનો છે. ભારત સરકારના એક વરિષ્ઠ અધિકારીએ કહ્યું કે અમેરિકામાં થતી તમામ પ્રકારની આયાત પર 5 એપ્રિલથી સાર્વત્રિક 10 ટકા ટેરિફ લાગુ થશે, જ્યારે બાકીનો 16 ટકા ટેરિફ 10 એપ્રિલથી લાગુ થશે. વાણિજ્ય મંત્રાલય આ ટેરિફની અસરનું વિશ્લેષણ કરી રહ્યું છે. એવી જોગવાઈ છે કે જો કોઈ દેશ અમેરિકા સમક્ષ ટેરિફ સંબંધિત ચિંતાઓ ઉઠાવે છે તો ટ્રમ્પ વહીવટીતંત્ર તે દેશ પર ટેરિફ દર ઘટાડવાનું વિચારી શકે.

ફાર્માસ્યુટિકલ્સ, ઊર્જા અને ચોક્કસ ખનિજોની આયાતને મુક્તિ

અમેરિકાના રાષ્ટ્રપતિ ડોનાલ્ડ ટ્રમ્પે તેમના પારસ્પરિક ટેરિફમાં ફાર્માસ્યુટિકલ્સ, ઊર્જા અને ચોક્કસ ખનિજોની આયાતને મુક્તિ આપી, જેનાથી ભારતના જેનેરિક દવાઓ ઉદ્યોગને રાહત મળશે.કેટલીક વસ્તુઓ પર પારસ્પરિક ટેરિફ લાગુ નહીં પડે. જેમાં 50 યુએસસી 1702(બી) ને આધીન વસ્તુઓ, સ્ટીલ/એલ્યુમિનિયમ વસ્તુઓ અને ઓટો/ઓટો ભાગો, તાંબુ, ફાર્માસ્યુટિકલ્સ, સેમિકન્ડક્ટર અને લાકડાની વસ્તુઓ, ભવિષ્યમાં કલમ 232 ટેરિફ લાગુ પડી શકે તેવી બધી વસ્તુઓ, ઊર્જા અને અન્ય ચોક્કસ ખનિજો જે યુનાઇટેડ સ્ટેટ્સમાં ઉપલબ્ધ નથી તેનો સમાવેશ થાય છે.

અમેરિકન જનતા માટે આઇફોન અને કાર સહિત ઘણી વસ્તુઓ મોંઘી થવાની શક્યતા

ડોનાલ્ડ ટ્રમ્પે નવા ટેરિફની જાહેરાત કરી છે. હવે તેમનું માનવું છે કે આ નિર્ણય અમેરિકા અને તેના લોકોના હિતમાં લેવામાં આવ્યો છે.  હવે પ્રશ્ન એ છે કે ટ્રમ્પની ટેરિફ યાદીમાં એવા ઘણા દેશોનો સમાવેશ થાય છે, જેના પર ટેરિફ દરો સીધી રીતે અમેરિકન નાગરિકોને અસર કરી શકે છે. આમાં ચીનનું નામ પણ સામેલ છે. ટ્રમ્પના નવા નિર્ણયથી અમેરિકન જનતા માટે આઇફોન અને કાર સહિત ઘણી વસ્તુઓ મોંઘી થવાની શક્યતા છે. ઘણા દેશો એવા છે જ્યાંથી અમેરિકામાં સામાન આયાત કરવામાં આવે છે અને તેઓ ઊંચા ટેરિફનો સામનો કરી રહ્યા છે. ઘણી અમેરિકન કંપનીઓએ પણ આ દેશોમાં પોતાના ઉત્પાદન એકમો સ્થાપ્યા છે. જ્યારે, ઘણી કંપનીઓ એવી છે જે આ દેશોમાંથી સામાન આયાત કરે છે અને તેને અમેરિકન બજારમાં વેચે છે. જે કંપનીઓ ઊંચા ટેરિફનો સામનો કરી રહી છે, ત્યાં એવી શક્યતા છે કે તેઓ તેમના ઉત્પાદનોના ભાવમાં વધારો કરી શકે છે. આ કારણે, વધુ ફી ચૂકવવી પડશે. એટલું જ નહીં, શક્ય છે કે કંપનીઓ આયાત બંધ કરી શકે. જોકે, હજુ સુધી કોઈ કંપનીએ આવી જાહેરાત કરી નથી. જો આવું કંઈક થશે, તો અમેરિકન બજારમાં માલની અછત સર્જાશે અને કિંમતો વધશે

ભારતીય ઓટો કમ્પોનન્ટ નિકાસકારોને ફટકો

રાષ્ટ્રપતિ ડોનાલ્ડ ટ્રમ્પના તમામ આયાતી વાહનો અને આયાતી ઓટો પાર્ટ્સ પર 25 ટકા ટેરિફ લાદવાના નિર્ણયથી ભારતીય ઓટો કમ્પોનન્ટ નિકાસકારોને ફટકો પડશે, જ્યારે યુનાઇટેડ સ્ટેટ્સ (યુએસ) માં ખરીદદારો માટે કિંમતોમાં 8-25 ટકાનો વધારો થઈ શકે છે, નિષ્ણાતો કહે છે કે ડેટા અનુસાર, અમેરિકાએ 2024 માં લગભગ 8 મિલિયન કાર આયાત કરી હતી, જે લગભગ 240 બિલિયન ડોલરના વેપાર મૂલ્યમાં પરિણમી હતી. નાણાકીય સેવાઓ કંપની વેડબશ સિક્યોરિટીઝ અનુસાર, યુએસમાં બનેલી કારમાં આયાતી ઘટકોનો લગભગ 40 ટકા હિસ્સો હતો. મુખ્ય ઓટોમેકર્સ માટે કામ કરતી કન્સલ્ટન્સી એન્ડરસન ઇકોનોમિક ગ્રુપના તાજેતરના અંદાજ મુજબ, વાહન પર આધાર રાખીને ટેરિફને કારણે પ્રતિ કાર 4,000 ડોલરથી 12,500 ડોલરનો ભાવ વધારો થઈ શકે છે.

ટેરિફ યાદીમાં રશિયા કેમ નહિ?

એક્સિઓસના અહેવાલ મુજબ, વ્હાઇટ હાઉસના પ્રેસ સેક્રેટરી કેરોલિન લેવિટે સમજાવ્યું કે રશિયાને આ યાદીમાં બાકાત રાખવામાં આવ્યું હતું કારણ કે તે પહેલાથી જ યુએસ પ્રતિબંધોને આધીન છે, જે બંને રાષ્ટ્રો વચ્ચે કોઈપણ અર્થપૂર્ણ વેપારને અવરોધે છે. લેવિટે ઉમેર્યું કે રશિયા હજુ પણ વધારાના પ્રતિબંધોનો સામનો કરી શકે છે. આ મુક્તિ હોવા છતાં, અમેરિકા અને રશિયા વચ્ચેનો વેપાર મોરેશિયસ અને બ્રુનેઈ જેવા દેશો કરતા વધારે રહે છે, જે ટ્રમ્પની યાદીમાં સામેલ હતા.​​​​​​​

ટેરિફ નિર્ણયથી ભારતના કાપડ ઉદ્યોગને ફાયદો થશે

નિષ્ણાતો કહે છે કે ટેરિફ નિર્ણયથી ભારતના કાપડ ઉદ્યોગને ફાયદો થશે કારણ કે વિયેતનામ, બાંગ્લાદેશ અને ચીન જેવા તેના સ્પર્ધકોને વધુ ટેરિફનો સામનો કરવો પડશે. જો વેપાર વાટાઘાટો બાદ કપાસની આયાત પર શૂન્ય ડ્યુટી લાગે છે તો તે વધુ ફાયદાકારક બની શકે છે. ભારતીય કાપડ નિકાસ માટે એક મુખ્ય પરિબળ યુએસમાં ખરીદદારો હશે. ભૂતકાળમાં, ભારત, બાંગ્લાદેશ અને વિયેતનામ કપાસના વસ્ત્રોની નિકાસ માટે સમાન ટેરિફ માળખાનો સામનો કરતા હતા. જો કે, તાજેતરના ફેરફારો સાથે ભારત હવે તુલનાત્મક દ્રષ્ટિએ આ સ્પર્ધાત્મક રાષ્ટ્રો પર ટેરિફનો ફાયદો ધરાવે છે, જે સંભવિત રીતે વસ્ત્રોની નિકાસ માટે યુએસ બજારમાં તેની સ્પર્ધાત્મકતામાં વધારો કરશે. ટ્રમ્પની જાહેરાત મુજબ, વિયેતનામના કાપડ નિકાસ પર 46 ટકા, બાંગ્લાદેશના 37 ટકા અને ચીનના 54 ટકા ટેરિફનો સામનો કરવો પડશે. જો ભારત કપાસ પરની આયાત ડ્યુટી 11 ટકાથી પાછી ખેંચીને 0 ટકા કરે છે, તો તેનાથી બંને દેશોને ફાયદો થશે.

ભારત સરકાર દ્વારા અમેરિકાના 26 ટકા ટેરિફની અસરનું વિશ્લેષણ 

વાણિજ્ય મંત્રાલયના એક વરિષ્ઠ અધિકારીએ જણાવ્યું હતું કે ભારત સરકાર અમેરિકા દ્વારા લાદવામાં આવેલા 26 ટકા ટેરિફની આર્થિક અસર પર વિશ્લેષણ કરી રહી છે. યુએસ રાષ્ટ્રપતિ ડોનાલ્ડ ટ્રમ્પ દ્વારા જાહેર કરાયેલું આ પગલું, અમેરિકન નિકાસ પર ઉચ્ચ ડ્યુટી લાદતા દેશોને લક્ષ્ય બનાવતી વ્યાપક ટેરિફ નીતિનો એક ભાગ છે. અધિકારીના જણાવ્યા અનુસાર, સાર્વત્રિક 10 ટકા ટેરિફનો પ્રથમ તબક્કો 5 એપ્રિલથી અમેરિકામાં થતી તમામ આયાત પર લાગુ થશે. બાકીના 16 ટકા, જે ભારત માટે કુલ ડ્યુટી 26 ટકા કરશે, તે 10 એપ્રિલથી લાગુ થવાનું છે. ટેરિફની મિશ્ર અસર છે અને ભારત માટે આંચકારૂપ નથી. હાલ વાટાઘાટો માટે અવકાશ છે. વાણિજ્ય પ્રધાન પિયુષ ગોયલ ગત મહિને દ્વિપક્ષીય વેપાર કરાર પર વાટાઘાટો માટે વોશિંગ્ટન ડીસીની મુલાકાતે ગયા હતા. આ મુલાકાતનો હેતુ સંભવિત ટેરિફ વધારાને સંબોધવા અને આર્થિક સંબંધોને મજબૂત બનાવવાનો હતો.

ટ્રમ્પની ટેરિફ જાહેરાતથી વિશ્વના નેતાઓ ગુસ્સે થયા 

ટ્રમ્પની નવા ટેરિફની જાહેરાતથી વિશ્વમાં વેપાર યુદ્ધ શરૂ થવાનો ભય વધી ગયો છે. ટ્રમ્પના આ નિર્ણયથી વિશ્વના નેતાઓ ગુસ્સે થયા છે અને પોતાની ભડાશ કાઢી છે.  કેનેડાના વડાપ્રધાન માર્ક કાર્નેએ ટ્રમ્પના ટેરિફ સામે લડવાની પ્રતિજ્ઞા લીધી છે. કાર્નેએ બદલાના પગલાં સાથે ટેરિફનો સામનો કરવાની વાત કરી. બ્રિટિશ વડાપ્રધાન કીર સ્ટાર્મરે પારસ્પરિક ટેરિફ પર તીખી ટિપ્પણીઓ કરી અને કહ્યું કે, વેપાર યુદ્ધ કોઈના હિતમાં નથી. અમે બધી સંભવિત પરિસ્થિતિઓ માટે તૈયારી કરી લીધી છે. અમે કોઈ પણ શક્યતાને નકારીશું નહીં. જર્મનીએ ચેતવણી આપી છે કે, વેપાર યુદ્ધ બંને પક્ષોને નુકસાન પહોંચાડશે. સ્પેનના વડાપ્રધાન પેડ્રો સાંચેઝે કહ્યું કે, તેમનો દેશ તેની કંપનીઓ અને કામદારોનું રક્ષણ કરશે અને ખુલ્લા વિશ્વ માટે પ્રતિબદ્ધ રહેશે. આયર્લેન્ડના વેપાર મંત્રીએ કહ્યું કે તેમનો દેશ અને ઇયુ અમેરિકા સાથે વાતચીત દ્વારા ઉકેલ શોધવા માટે તૈયાર છે. ઇટાલીના વડાપ્રધાન ગિઓર્ડાનો મેલોનીએ વેપાર યુદ્ધ ટાળવા માટે રાષ્ટ્રપતિ ટ્રમ્પ સાથે કામ કરવાની પ્રતિજ્ઞા લીધી છે. ફ્રેન્ચ સરકારના પ્રવક્તાએ જણાવ્યું હતું કે ઇયુ એપ્રિલના અંત પહેલા ટ્રમ્પના નવા ટેરિફનો જવાબ આપશે.