મૃતકની ઓળખ મેળવવા તપાસ : ટ્રક-ટેન્કર ચાલકની શોધખોળ

મેઘપર વિસ્તારમાં બે દિવસ પહેલા બપોરના સુમારે ટ્રક-ટેન્કરના ચાલકે ગફલતભરી રીતે ચલાવીને એક અજાણ્યા પુરૂષને હડફેટે લઇ મોત નિપજાવ્યુ હતું આ અંગે ચાલક સામે ફરીયાદ કરવામાં આવી છે. જયારે પોલીસ દ્વારા મૃતકની ઓળખ મેળવવા સહિતની કાર્યવાહી ચલાવવામાં આવી રહી છે.

મોટી ખાવડી સતીવાડી વિસ્તારમાં રહેતા સામાજીક કાર્યકર વિપુલસિંહ જાડેજાએ ગઇકાલે મેઘપર પોલીસમાં ટ્રક નં. જીજે-12-બીએકસ-9378ના ચાલક સામે ફરીયાદ નોંધાવી હતી.

વિગત મુજબ ગત તા. 13ના બપોરના 12 વાગ્યાના સુમારે ઉપરોકત નંબરના ટ્રક-ટેન્કરના ચાલકે આજુ બાજુ જોયા વીના ગફલત અને બેફીકરાઇથી પોતાનું વાહન ચલાવીને આશરે 40 થી 45 વર્ષના એક અજાણ્યા માણસ ઉપર ટાયર ફેરવી દેતા ગંભીર ઇજા સબબ તેનું મૃત્યુ નિપજયુ હતું, અકસ્માત સર્જી ચાલક નાશી ગયો હતો જેની શોધખોળ ચલાવવામાં આવી રહી છે.

મેઘપરના હેડ કોન્સ એલ.જી. જાડેજા દ્વારા ફરીયાદના આધારે ટ્રક ચાલકની અટકાયત કરવા અને મૃતકની ઓળખ મેળવવા સહિતની તપાસ કરવામાં આવી રહી છે.