દ્વારકામાં ગોમતી ઘાટ પાસેથી યુવાનોનો આઈફોન ચોરાયો

દેવભૂમિ દ્વારકા જિલ્લાના બેટ દ્વારકામાંથી કોઇ તસ્કરો ઇલેક્ટ્રીક કેબલ વાયરની ચોરી લઇ ગયાની ફરિયાદ પોલીસમાં નોંધાવાઇ છે, જ્યારે દ્વારકામાં ગોમતી ઘાટ પાસેથી એક યુવાનનો આઈફોન ચોરાયો હોવાની ફરિયાદ પણ પોલીસમાં નોંધાવવામાં આવી છે.

બેટ દ્વારકાના પાંજ વિસ્તારમાંથી ગત તા. 4 નવેમ્બરથી 14 નવેમ્બર સુધીના સમયગાળા દરમિયાન કોઈ તસ્કરો પીજીવીસીએલના જમીનમાં નાખવાના 150 સ્ક્વેર એમ.એમ. કોપર વાયર ચોરી કરીને લઈ ગયા હોવાનો બનાવ પ્રકાશમાં આવ્યો છે. આ પ્રકરણમાં રૂપિયા 60,000 ની કિંમતના 40 મીટર વાયરની ચોરી થતા આ અંગે મૂળ અરવલ્લી જિલ્લાના રહીશ અને હાલ ઓખામાં પીજીવીસીએલ વિભાગમાં ડેપ્યુટી એન્જિનિયર તરીકે ફરજ બજાવતા ગોવિંદભાઈ ધર્માજી ખરડી દ્વારા બેટ દ્વારકા પોલીસ મથકમાં ધોરણસર ફરિયાદ નોંધાવવામાં આવી છે.

તેમજ ભાટિયામાં રહેતા વિવેક જયંતીલાલ દાવડા નામના 22 વર્ષના યુવાન દ્વારકામાં આવ્યા હતા ત્યારે ગોમતીઘાટ પાસે આવેલી એક ધર્મશાળા નજીક કોઈ અજાણ્યા ગઠિયાઓ રૂ. 1.40 લાખની કિંમતનો આઈફોન 14 સેરવી ગયા હોવાની ફરિયાદ દ્વારકા પોલીસ મથકમાં નોંધાવવામાં આવી છે.