મોડી રાત્રે ભાવનગર શહેરમાં ૫૮ કિ.મી.ની ઝડપે પુન: મીની વાવાઝોડુ ફૂંકાયું હતું.આથી શહેરના અનેક વિસ્તારોમાં કલાકો સુધી વીજળી ગુલ થઈ હતી. વીજતંત્રની લાપરવાહીથી લોકોમાં પ્રચંડ રોષ ફેલાયો હતો.હિલડ્રાઇવ વીજ સબ સ્ટેશનમાં લોકોના ટોળાએ હલ્લાબોલ કર્યો હતો.મીની વાવાઝોડાના કારણે કેટલાક વૃક્ષો પડ્યા હતા.હજુ આગામી ૧૧ મે સુધી ભારે પવન સાથે માવઠાની આગાહી હવામાન વિભાગે કરી છે.
ભાવનગર શહેરમાં સોમવારે સાંજે મીની વાવાઝોડાની સાથે એક ઈંચથી વધુ વરસાદ પડ્યો હતો.વીજ કડાકા ભડાકાની સાથે ધોધમાર વરસાદ કરા સાથે પડ્યો હતો.આથી શહેરના અનેક વિસ્તારોમાં કલાકો સુધી વીજળી ગુલ થઈ હતી.અનેક વૃક્ષો પડ્યા હતા.ઠેર ઠેર પાણી ભરાયાં હતાં.આથી લોકો અને વાહનચાલકોને હાલાકી વેઠવી પડી હતી.
મોડી સાંજે માંડ પવન અને વરસાદ શાંત પડયા અને વીજળી પુરવઠો અવારનવાર ગુલ થયા પછી ઠેકાણે પડ્યો હતો.ત્યાં નગરજનો પર મોડી રાત્રે મીની વાવાઝોડાની આફત સર્જાઈ હતી.પુન: શહેરના અનેક વિસ્તારોમાં કલાકો સુધી વીજળી ગુલ થઈ હતી.
મોડી રાત્રે સવા બાર વાગ્યાના સુમારે શહેરમાં ૫૮ કિ.મી.ની ઝડપે પુન: મીની વાવાઝોડુ ફૂંકાયું હતું. આથી શહેરના અનેક વિસ્તારોમાં કલાકો સુધી વીજળી ગુલ થઈ હતી.સખ્ત બફારાના કારણે લોકો ભારે પરેશાન થયા હતા.નાના બાળકો, વૃદ્ધો, બીમારો માટે સ્થિતિ અસહનીય અને દયનીય બની હતી. વીજ કચેરીના લેન્ડલાઈન ફોન નીચે મૂકી દેવાયા હતા.મોબાઈલ ફોન પણ ઉપાડવાની વીજ કર્મચારીઓ કે અધિકારીઓએ તસ્દી લીધી ન હતી.
આથી સાંજે અને રાત્રે કલાકો સુધી વીજળી ગુલ થતાં અને વીજતંત્રની લાપરવાહીથી લોકોમાં પ્રચંડ રોષ ફેલાયો હતો. મોડી રાત્રે હિલડ્રાઇવ વીજ સબ સ્ટેશનમાં લોકોના ટોળાએ હલ્લાબોલ કર્યો હતો.ત્યારબાદ વહેલી સવારે માંડ વીજ પુરવઠો યથાવત થયો હતો.