BCCIએ ચેમ્પિયન્સ ટ્રોફી 2025 માટે ટીમ ઈન્ડિયાને પાકિસ્તાન મોકલવાનો ઈન્કાર કરી દીધો છે. જ્યારથી ભારતીય ક્રિકેટ બોર્ડે આ ટૂર્નામેન્ટને લઈને પોતાનો નિર્ણય જાહેર કર્યો છે. ત્યારથી ક્રિકેટ જગતમાં ખળભળાટ મચી ગયો છે. BCCIના નિર્ણયને લઈને સમગ્ર પાકિસ્તાનમાં હોબાળો મચી ગયો છે. આ સમાચારને લઈને પૂર્વ પાકિસ્તાની ક્રિકેટર તનવીર અહેમદે તમામ હદો વટાવી દીધી છે અને અપશબ્દોનો સહારો લીધો છે. તેણે સોશિયલ મીડિયા પર ખુલ્લેઆમ વાંધાજનક શબ્દોનો ઉપયોગ કર્યો છે.

તનવીર અહેમદે શું કહ્યું?

તનવીર અહેમદ છેલ્લા કેટલાક દિવસોથી નારાજ છે અને ભારત પાકિસ્તાન ન જવા અંગે નિવેદનો આપી રહ્યો છે. તેણે સોશિયલ મીડિયા પર કહ્યું, 'બીસીસીઆઈ, તમારા બંને હાથમાં આ બંગડીઓ પહેરીલો.' તે આટલેથી ન અટક્યો, તેણે ભારતીય ક્રિકેટ બોર્ડ માટે જૂઠા, સસ્તા, ગંદા અને ઢોંગી જેવા વાંધાજનક શબ્દોનો પણ ઉપયોગ કર્યો. તનવીરે વધુમાં કહ્યું કે BCCI પર વિશ્વાસ કરવાને બદલે એવા ગધેડા પર વિશ્વાસ કરવો વધુ સારું છે જે છેતરપિંડી પણ નહીં કરે. તેણે પાકિસ્તાની મીડિયાને અપીલ કરી કે ભારતીય મીડિયાના લોકોને આમંત્રણ ન આપે.

આઈસીસીની વાતચીત ચાલુ

BCCIના નિર્ણય પછી, પાકિસ્તાન ક્રિકેટ બોર્ડે ભારતને કોઈપણ ટૂર્નામેન્ટમાં નહીં રમવાની ધમકી આપી હતી અને જો હોસ્ટિંગ છીનવી લેવામાં આવશે તો ચેમ્પિયન્સ ટ્રોફીમાંથી પોતાનું નામ પાછું ખેંચી લેશે. આટલું જ નહીં, અહેવાલ મુજબ, 12 નવેમ્બર, મંગળવારે આઈસીસીને એક ઈમેલ મોકલવામાં આવ્યો હતો, જેમાં ભારતીય ક્રિકેટ કંટ્રોલ બોર્ડને ટીમ ઈન્ડિયાને ન મોકલવા માટે નક્કર કારણ આપવાની માંગ કરવામાં આવી છે. ICC તમામ ટીમો સાથે સતત વાત કરી રહ્યું છે અને ટૂર્નામેન્ટના શેડ્યૂલને લઈને ચર્ચા ચાલી રહી છે. કેટલાક અહેવાલોમાં દાવો કરવામાં આવ્યો છે કે આઇસીસીએ બેકઅપ તરીકે દક્ષિણ આફ્રિકામાં ટુર્નામેન્ટનું આયોજન કરવાની યોજના બનાવી છે.