સૌરાષ્ટ્રમાં મેઘરાજા ચોથો રાઉન્ડ વરસાવી રહ્યા છે ત્યારે રાજકોટમાં ગત રાત્રે હળવા ઝાપટા વરસતા ઝોનવાઇઝ બે મીમીથી પાંચ મીમી જેવો સામાન્ય વરસાદ નોંધાયો હતો, આ સાથે રાજકોટ શહેરનો મોસમનો કુલ વરસાદ 54 ઇંચ થયો છે.
વિશેષમાં રાજકોટ મહાપાલિકાના ફાયર બ્રિગેડ ક્ધટ્રોલ રૂમના સૂત્રોના જણાવ્યા મુજબ ગત રાત્રી દરમિયાન વેસ્ટ ઝોનમાં પાંચ મીમી વરસાદ સાથે મોસમનો કુલ વરસાદ 1282 મીમી, ઇસ્ટ ઝોનમાં પાંચ મીમી વરસાદ સાથે મોસમનો કુલ વરસાદ 1025 મીમી અને સેન્ટ્રલ ઝોનમાં બે મીમી વરસાદ સાથે મોસમનો કુલ વરસાદ 1349 મીમી (54 ઇંચ) નોંધાયો છે. આગામી દિવસોમાં હજુ ભારે વરસાદની આગાહી હોય ફાયર બ્રિગેડ સહિત સમગ્ર મહાપાલિકા તંત્ર એલર્ટ મોડ ઉપર છે.
રાજકોટ શહેરને પીવાનું પાણી પુરૂ પાડતા આજી-1, ન્યારી-1 અને ભાદર-1 ડેમ છલોછલ ભરેલા છે, ચાલુ ચોમાસે આ જળાશયો લગભગ એકાદ મહિના સુધી સતત ઓવરફ્લો થયા હતા, દરમિયાન હાલ દશેરાથી મેઘરાજાએ ચોથો રાઉન્ડ વરસાવવાનું શરૂ કરતાની સાથે જ ન્યારી-1 ડેમ અને ભાદર-1 ડેમના દરવાજા ફરી ખોલવા પડ્યા છે. એકંદરે ચોમાસા દરમિયાન જળાશયોમાંથી જેટલું પાણી ઉપાડ્યું તેટલું જ ફરી આવી ગયું છે.