ગોંડલના વોરા કોટડા રોડ પર પતિએ જ પત્નીની હત્યા કર્યાની ઘટના બની છે. પતિએ મારૂ નાક કપાવ્યું કહી પત્ની પર છરી સાથે તૂટી પડ્યો હતો. ઉપરાછાપરી છરીના ઘા ઝીંકી દીધા હતા. આથી તેને પહેલા ગોંડલ સિવિલ હોસ્પિટલ ખસેડાઈ હતી. જોકે, વધુ સારવાર માટે રાજકોટ સિવિલ ખસેડાઇ હતી. પરંતુ સારવાર દરમિયાન મોત નીપજતા બનાવ હત્યામાં પલટાયો છે. 

બનાવ હત્યામાં પલટાયો
પ્રાપ્ત વિગત મુજબ, ગોંડલ સિવિલ હોસ્પિટલની સામે ગોંડલી નદીના ખાડા વિસ્તારમાં પંચ પીરની ધાર પાસે દિનેશ ડાભીએ મારૂ નાક કપાવ્યુ કહી પત્ની મનીષાબેન ડાભીને છરીના ઘા ઝીંક્યા હતા. આથી મનીષાબેન લોહીલૂહાણ હાલતમાં જ ઢળી પડી હતી. તેમને સારવાર માટે પહેલા ગોંડલ સિવિલ હોસ્પિલ ખસેડાઈ હતી. જોકે વધુ સારવારની જરૂર હોય તેને રાજકોટ સિવિલ હોસ્પિટલ ખસેડાઈ હતી. પરંતુ સારવાર કારગત ન નિવડતા મનીષાબેને દમ તોડી દીધો હતો. 

પોલીસે દિનેશને પકડવા શોધખોળ હાથ ધરી
બાદમાં મૃતક મહિલાના મૃતદેહને પીએમ અર્થે રાજકોટ હોસ્પિટલમાં ખસેડવામાં આવ્યો હતો. આ અંગે ગોંડલ શહેર A ડિવિઝન પોલીસે ઘટનાસ્થળે પહોંચીને તપાસ હાથ ધરી છે. પોલીસે છરી મારીને હત્યા કરનાર પતિ દિનેશને પકડવા ચક્રો ગતિમાન કર્યા છે.