આસામમાં સોમવારે પૂરની સ્થિતિ ગંભીર રહી હતી અને 28 જિલ્લાઓમાં લગભગ 23 લાખની વસ્તી પ્રભાવિત થઈ છે. મોટાભાગની નદીઓના જળસ્તર ખતરાના નિશાનથી ઉપર છે. આ વર્ષે રાજ્યમાં પૂર, ભૂસ્ખલન અને વાવાઝોડામાં 78 લોકોના મોત થયા છે જ્યારે માત્ર પૂરને કારણે 66 લોકોના મોત થયા છે.

આસામમાં પૂરની સ્થિતિ 8 જુલાઈ, સોમવારે પણ ગંભીર રહી હતી અને 28 જિલ્લાઓની લગભગ 23 લાખ વસ્તી આ પૂરથી પ્રભાવિત થયા છે. રાજ્યની મોટાભાગની નદીઓના જળસ્તર ખતરાના નિશાનથી ઉપર વહી રહ્યા છે. ત્યારે પૂરના કારણે 68432.75 હેક્ટર પાક જમીન ડૂબી ગઈ છે. 315520 લોકોને રાહત સામગ્રી આપવામાં આવી છે.

આસામના મુખ્યમંત્રી હિમંતા બિસ્વા સરમાએ કહ્યું કે પૂર પ્રભાવિત જિલ્લાઓમાં તમામ રાહત શિબિરોમાં સંપૂર્ણ વ્યવસ્થા કરવામાં આવી છે. અને સ્થિતિ સામાન્ય ન થાય ત્યાં સુધી આવશ્યક ચીજવસ્તુઓનો પૂરતો સ્ટોક રાખવામાં આવ્યો છે. તેમણે કહ્યું કે પૂર રાહત શિબિરોની સલામતી અને સ્વચ્છતા એ સરકારની પ્રાથમિકતા છે અને તેમની ટીમ ત્યાં રહેતા લોકોના સંપર્કમાં છે.

3,446 ગામોના 23 લાખ લોકો પૂરથી પ્રભાવિત

હાલમાં 28 જિલ્લાના 3,446 ગામોના 23 લાખ લોકો પૂરથી પ્રભાવિત થયા છે, જ્યારે 68,432.75 હેક્ટર પાકની જમીન પાણીના પૂરમાં ડૂબી ગઈ છે. કુલ 53,689 લોકોએ 269 રાહત શિબિરોમાં આશ્રય લીધો છે, જ્યારે 3,15,520 લોકોને રાહત કેમ્પમાં ન રહેતાં રાહત સામગ્રી પૂરી પાડવામાં આવી છે.