જામનગર જિલ્લાના જામજોધપુર તાલુકાના સમાણા ગામ પાસે બાઈક અને ડમ્પર વચ્ચે અકસ્માત સર્જાયો હતો. જે અકસ્માતમાં બાઈક સવાર બાવળીદડ ગામનું દંપતી ઘાયલ થયું છે. પોલીસે ડમ્પર ચાલક સામે ગુનો નોંધ્યો છે.
આ અકસ્માતના બનાવની વિગત એવી છે કે જામજોધપુર તાલુકાના બાવળીદડ ગામમાં રહેતા ગોગનભાઈ ગોપાલભાઈ ખાંભલા (૩૭ વર્ષ) પોતાના બાઈકમાં પોતાના પત્ની માનસીબેન ને પાછળ બેસાડીને જામજોધપુર ના સમાણા ગામના પાટીયા પાસેથી પસાર થઈ રહ્યા હતા.
જે દરમિયાન ફૂટપટ ઝડપે આવી રહેલા જીજે ૧૦- બી.એન. ૮૬૪૯ નંબરના ડમ્પર ના ચાલકે બાઈકને ઠોકર મારતાં અકસ્માત સર્જાયો હતો.
જે અકસ્માતમાં ગોગનભાઈ તથા માનસીબેન બંનેને ફ્રેકચર સહિતની નાની મોટી ઈજા થઈ હતી, અને તેઓને હોસ્પિટલમાં સારવાર આપવામાં આવી છે.
આ અકસ્માતના બનાવની જાણ થતાં શેઠ વડાળા પોલીસ સ્ટેશનના સ્ટાફે ગોગનભાઈ ની ફરિયાદ ના આધારે  ડમ્પર ચાલક સામે ગુન્હો નોંધ્યો છે, અને વધુ તપાસ હાથ ધરી છે.