આગામી તા.૨૬ મે ના પીએમના કચ્છ કાર્યક્રમ માટે રાજકોટ એસટી ડિવિઝનની ૨૬૦ સહિત સૌરાષ્ટ્રના અન્ય વિવિધ ડિવિઝનની કુલ ૬૫૦ બસ અને રાજ્ય સ્તરે કુલ ૧૩૦૦ એસટી બસ ફાળવવામાં આવનાર હોય આ દિવસે સૌરાષ્ટ્રમાં કુલ ૨૫૦૦ જેટલા એસટી બસ રૂટ રદ થશે તેમ જાણવા મળે છે.

વિશેષમાં એસટી નિગમના સુત્રોમાંથી પ્રાપ્ત વિગતો મુજબ, આગામી તા.૨૬-મે ને સોમવારે વડાપ્રધાનની સંભવિત કચ્છ મુલાકાતના પગલે તૈયારીનો ધમધમાટ શરૂ થયો છે જેમાં સૌરાષ્ટ્રભરમાંથી મેદની લાવવા-લઈ જવા માટે ૧૩૦૦ એસટી બસો રોકવામાં આવી રહ્યાનું જાણવા મળ્યું છે.કચ્છમાં વડાપ્રધાનની વિશાળ જાહેર સભા યોજાશે જેમાં મોટી સંખ્યામાં શ્રોતાઓ હાજર રહે તેવી તૈયારી થઈ રહી છે જે અન્વયે લોકોને આ સ્થળે લાવવા-લઈ જવા માટે રાજકોટ ડિવિઝનની ૨૬૦, કચ્છ એસ.ટી.ડિવિઝનની ૨૬૦, પાલનપુર ડિવિઝનની ૧૬૦, જામનગર ડિવિઝનની ૧૩૦ અમરેલીની ૧૦૫ અને જુનાગઢ ડિવિઝનથી ૧૫૫ સહિત આશરે ૧૩૦૦ એસટી.બસો આ માટે ફાળવાશે. જેના કારણે સૌરાષ્ટ્રમાં એસ.ટી.બસોના અંદાજે અઢી હજાર રૂટ રદ કરાશે જેથી હજારો મુસાફરોને આ દિવસે એસ.ટી.બસ સેવા મળશે નહીં.