રાજકોટમાં બુધવારે સવારના સમયે ઇન્દિરા સર્કલ પાસે સિટી બસે આઠ વાહનોને હડફેટે લેતા આ અકસ્માતમાં ચાર વ્યક્તિઓના મોત થયા હતા. જ્યારે બાળકી સહિત ચારને ઇજા પહોંચતી હતી. અકસ્માતની આ ઘટના બાદ વિફરેલા ટોળાએ સિટી બસ પર પથ્થરમારો કરી તોડફોડ કરી હતી તેમજ તેના ડ્રાઇવરને બહાર ખેંચી તેને બેફામ મારમાર્યો હતો. આ સમયે અહીં ફરજ પર હાજર ટ્રાફિક પોલીસમેને ટોળાને વિખેરવાની કોશિશ કરી અને ડ્રાઇવરને એમ્બ્યુલન્સમાં જવા દેતા આ ટોળાએ પોલીસમેન સાથે ઝપાઝપી કરી તેને મારમાર્યો હતો. બનાવ અંગે પોલીસમેનની ફરિયાદ પરથી યુનિવર્સિટી પોલીસ સ્ટેશનમાં 15 થી 20 અજાણ્યા શખસોના ટોળા વિરુદ્ધ ગુનો નોંધી કાયદેસરની કાર્યવાહી કરવામાં આવી છે. જેમાં પોલીસે ત્રણ આરોપીને ઝડપી લીધા બાદ વધુ એક આરોપીની ધરપકડ કરી છે.

રાજકોટ ટ્રાફિક શાખામાં ફરજ બજાવતા પોલીસમેન અજય ભીખાભાઈ ડાભી(ઉ.વ ૪૦ રહે. રેસકોર્સની સામે પોલીસ હેડ ક્વાર્ટર, રાજકોટ મૂળ ઉપલેટા) દ્વારા યુનિવર્સિટી પોલીસ સ્ટેશનમાં ૧૫ થી ૨૦ અજાણ્યા શખસોનું ટોળા વિરૂધ્ધ ફરિયાદ નોંધાવી છે. જેમાં જણાવ્યુ હતું કે અકસ્માતની ઘટના બાદ વિફરેલા ટોળાને સમજાવાની કોશિશ કરી હતી પરંતુ વિફરેલા ટોળાએ બસ પર પથ્થરમારો કરવાનું શરૂ કરી દીધું હતું. બાદમાં 15 થી 20 અજાણ્યા શખસો બસનો દરવાજો ખોલી ડ્રાઇવરને ઉપરથી ખેંચી નીચે ઉતારી માર મારવા લાગ્યા હતા.જેથી ટ્રાફિક પોલીસ મેને વચ્ચે પડી ટોળાને વિખેરાઇ જવા કહ્યું હતું તેમ છતાં તેઓ તેને માર મારતા હોય પોલીસમેને ડ્રાઇવરને અહીંથી ખેંચી એમ્બ્યુલન્સમાં મોકલી દીધો હતો.

બાદમાં આ ટોળાએ પોલીસમેન અજયભાઈ ડાભી સાથે ઉગ્ર બોલાચાલી કરી ઝપાઝપી, ગાળાગાળી કરવા લાગ્યા હતા અને કહેતા હતા કે, તમે ડ્રાઇવરને અમને કેમ ન સોપ્યો અને એમ્બ્યુલન્સમાં કેમ મોકલી દીધો? તેમ કહી પોલીસવાળા ભાઈએ ડ્રાઇવરને બચાવ્યો છે તેમ કહી કેટલાક શખસો બૂમો પાડવા લાગ્યા હતા અને પોલીસમેન સાથે હાથાપાઈ કરવા લાગ્યા હતા. ટોળું બેકાબુ બનતા પોલીસમેને જીવ બચાવવા અહીંથી દોટ મૂકી હતી. આ ઘટના અંગે ટ્રાફિક પોલીસમેન અજયભાઈ ડાભીની ફરિયાદ પરથી યુનિવર્સિટી પોલીસ સ્ટેશનમાં 15 થી 20 અજાણ્યા શખ્સોના ટોળા વિરુદ્ધ બસ પર પથ્થરોનો ઘા કરી તોડફોડ કરવા ગેરકાયદે મંડળી રચી બસના ડ્રાઇવરને માર મારવા અને પોલીસમેન સાથે હાથપાઇ કરી તેની ફરજમાં રૂકાવટ કરવા તથા સરકારી પ્રોપર્ટીને નુકસાન કરવા સહિતની કલમો હેઠળ ગુનો નોંધવામાં આવ્યો હતો.

આ મામલે પોલીસે આગાઉ ત્રણ આરોપીઓને ઝડપી લીધા હતાં.દરમિયાન પોલીસે વધુ એક આરોપી લક્ષ્મણ પોલાભાઇ સિંધવ (ઉ.વ ૧૮ રહે. રૈયાધાર સ્લમ કવાર્ટર ૭૧૩) ની ધરપકડ કરી અન્ય આરોપીઓને ઝડપી લેવા તપાસ યથાવત રાખી છે.