મહુવા-રાજુલા માર્ગ પર નેસવડ ચોકડી નજીક બેફામ ગતિએ પસાર થઈ રહેલા ટ્રકના ચાલકે કાબૂ ગુમાવતા બે શ્રમજીવી બાઈક સવાર યુવાનોને ધડાકાભેર ફંગોળતા બન્નેને ગંભીર ઇજાઓ થતા મહુવાની હોસ્પિટલમાં ખસેડાયા હતા. જ્યાં બન્નેને વધુ સારવારની જરૂર જણાતા ભાવનગર ખસેડવામાં આવ્યા હતા. ટ્રક અડફેટે ચડી ગયેલા બન્નેની સ્થિતિ નાજુક હોવાનું સૂત્રોથી જાણવા મળ્યું હતું.

અકસ્માત અંગે પ્રાપ્ત પ્રાથમિક વિગતો મુજબ, માર્કેટ યાર્ડમાં મજૂરી કામ કરતા અનવરભાઈ હનુભાઈ ગાહા અને અલાઉદીનભાઈ મુસ્તાકભાઈ ગાહા (રે. બન્ને ડુંગર ગામ) યાર્ડમાંથી મજૂરી કામ પૂરૂ કરી બાઈક પર પોતાના ગામ તરફ જવા નીકળ્યા હતા. ત્યારે મહુવા-રાજુલા માર્ગ પર નેસવડ ચોકડી નજીક બન્ને પાન-મસાલો ખાવા ઉભા રહ્યા હતા. આ દરમિયાન ડુંગળી ભરેલા અને બેફામ ગતિએ પસાર થઈ રહેલા ટ્રકના ચાલકે બન્નેને ધડાકાભેર અડફેટે લઈ ફંગોળ્યા હતા. 

ટ્રકની અડફેટે આવી ગયેલા બન્ને શ્રમજીવીઓ રોડથી થોડે દૂર પડ્યા હતા પરિણામે બન્નેને ગંભીર ઇજાઓ થતા ૧૦૮ મારફત સારવાર માટે મહુવાની હનુમંત હોસ્પિટલમાં ખસેડાતા ફરજ પરના તબીબે બન્નેને વધુ સારવારની જરૂર હોય ભાવનગર લઈ જવાનું જણાવતા તાબડતોબ ભાવનગર ખસેડવામાં આવ્યા હતા. જ્યાં બન્નેની સ્થિતિ નાજુક હોવાનું સૂત્રોથી જાણવા મળ્યું હતું.  અકસ્માતના પગલે પોલીસ કાફલાએ દોડી જઈ ટ્રક ચાલક સામે ગુનો નોંધવા સહિતની કાર્યવાહી હાથ ધરી હતી.