ગત તા.૭નાં રોજ રેલવે પોલીસ મથકના એએસઆઈ મંજુલાબેન, હેડ કોન્સ્ટેબલ વિપુલ અને લોકરક્ષક કાજલબેન પોતાની ફરજ પર હતાં ત્યારે સાંજના પોણા સાતેક વાગ્યે રેલવે પોલીસ સ્ટેશન ખાતે એક જાગૃત નાગરિક આવ્યા હતાં અને એક નવ વર્ષની બાળકીને સોંપી હતી. ત્યારબાદ પોલીસ મથકના સી-ટીમના કર્મચારીઓએ બાળકીનું નામઠામ પુછતાં તેણીનું નામ રશ્મીન રામ ગોપાલ જાટવ (રહે.રામબાગ ટેડી બગ્યા, જી.આગ્રા રાજ્ય ઉત્તરપ્રદેશ) હોવાનું જણાવ્યું હતું. ત્યારબાદ તેણીની વિશેષ પુછપરછ કરવામાં આવતાં માતા પિતાનો મોબાઈલ, ફોન નંબર યાદ ન હોય અને તે આગ્રા રેલવે સ્ટેશનથી તેની નાની સાથે પોતાના ઘરે જતી હતી તે વખતે ભૂલથી બીજી ટ્રેનમાં ચડી જતાં રાજકોટ પહોંચી ગઈ હતી.

ત્યારબાદ રાજકોટ રેલવે પોલીસ સ્ટેશનના કર્મચારીઓઅ આગ્રા પોલીસ અને યુપી પોલીસનો સંપર્ક કર્યો હતો અને ત્યારબાદ યુપી પોલીસ દ્વારા બાળકીના વાલી-વારસનો સંપર્ક થયો હતો. તેમજ તેમના માતા-પિતા રાજકોટ પહોંચે એટલા સમયગાળામાં બાળકીનો કબજો કાઠીયાવાડી બાલાશ્રમ ગોંડલ રોડને આપ્યો હતો. ત્યારબાદ બાળકીના વાલીવારસ તા.૧૦ના રાજકોટ પહોંચી જતાં તમની પાસેથી આધાર પુરાવાઓ ચેક કર્યા બાદ બાળકીનો કબજો તેમને સોંપી પરિવાર સાથે મિલન કરાવતાં રેલવે સ્ટેશન પર હૃદયદ્રાવક દ્રશ્યો સર્જાયા હતાં. બાળકીના પરિવારજનોએ રેલવે પોલીસનો આભાર વ્યકત કર્યો હતો.