ભારત અને પાકિસ્તાન વચ્ચે ચાલી રહેલા તણાવ વચ્ચે, તુર્કીએ પાકિસ્તાનને શસ્ત્રો અને દારૂગોળો પૂરો પાડવાના દાવાઓને નકારી કાઢ્યા છે. તુર્કીએ પોતાની સ્પષ્ટતામાં કહ્યું છે કે, તેમનું વિમાન પાકિસ્તાનને શસ્ત્રો સપ્લાય કરવાના હેતુથી રોકાયું ન હતું. સોશિયલ મીડિયા પર વાયરલ થઈ રહેલા અહેવાલો બાદ આ નિવેદન આવ્યું છે કે તુર્કી લશ્કરી પરિવહન વિમાન C-130E હર્ક્યુલસ કરાચીમાં ઉતર્યું છે, જેમાં લશ્કરી સાધનો હોવાનું કહેવાય છે.

આ અહેવાલો બાદ, તુર્કીના રાષ્ટ્રપતિ સંદેશાવ્યવહાર નિર્દેશાલયે સ્પષ્ટતા કરી કે, વિમાન ફક્ત ઇંધણ ભરવા માટે પાકિસ્તાનમાં રોકાયું હતું અને તેનો કોઈ લશ્કરી હેતુ નહોતો. ભારત અને પાકિસ્તાન વચ્ચેની તણાવપૂર્ણ પરિસ્થિતિ વચ્ચે, ગઈકાલે અરબી સમુદ્ર ઉપર ઉડતું જોવા મળેલા આ વિમાને વ્યાપક અટકળોને જન્મ આપ્યો હતો. કેટલાક મીડિયા રિપોર્ટ્સમાં દાવો કરવામાં આવ્યો છે કે લગભગ છ સી-130ઇ વિમાન પાકિસ્તાનમાં ઉતર્યા હતા. જોકે, તુર્કીએ આ દાવાઓને પાયાવિહોણા ગણાવ્યા અને કહ્યું, એક કાર્ગો વિમાન પાકિસ્તાનમાં ફક્ત ઇંધણ ભરવા માટે રોકાયું અને પછી તેની મુસાફરી પર આગળ વધ્યું. અધિકૃત વ્યક્તિઓ અને સંસ્થાઓના નિવેદનો વિના કરવામાં આવતી અટકળો પર વિશ્વાસ ન કરવો જોઈએ."

તુર્કી અને પાકિસ્તાન વચ્ચેની વ્યૂહાત્મક ભાગીદારી વર્ષોથી વધુ મજબૂત બની છે. તુર્કી પાકિસ્તાનને ડ્રોન અને અન્ય લશ્કરી સાધનોનો બીજો સૌથી મોટો સપ્લાયર છે. તેમ છતાં, તુર્કીએ આ તાજેતરની ઘટનામાં કોઈપણ લશ્કરી સહાયનો સ્પષ્ટપણે ઇનકાર કર્યો છે. આ ઘટના એવા સમયે બની છે જ્યારે ભારત અને પાકિસ્તાન વચ્ચે તણાવ ચરમસીમાએ છે.

તુર્કીના રાષ્ટ્રપતિ રેસેપ તૈયપ એર્દોગને ભારત અને પાકિસ્તાન વચ્ચે વધી રહેલા તણાવને ઓછો કરવાની અપીલ કરી છે. જમ્મુ અને કાશ્મીરના પહેલગામમાં થયેલા આતંકવાદી હુમલા બાદ બંને દેશો વચ્ચે વધેલા તણાવને ધ્યાનમાં રાખીને આ નિવેદન આવ્યું છે. આ હુમલામાં 26 પ્રવાસીઓ માર્યા ગયા હતા.

અમે નથી ઇચ્છતા કે ભારત અને પાકિસ્તાન વચ્ચે તણાવ ગંભીર સ્તરે પહોંચે. અમે બંને દેશોને પરિસ્થિતિને વધુ બગડતી અટકાવવા માટે તાત્કાલિક પગલાં લેવા વિનંતી કરીએ છીએ આવું ગઈકાલે અંકારામાં કેબિનેટની બેઠક બાદ એક પત્રકાર પરિષદમાં એર્દોગને કહ્યું. તેમણે પાકિસ્તાની લોકોને તુર્કીના મજબૂત સમર્થનની પણ પુષ્ટિ કરી.

પહેલગામ હુમલા બાદ ભારત અને પાકિસ્તાન વચ્ચે સરહદ પર તણાવ વધી ગયો છે. બંને દેશોએ એકબીજા સામે બદલો લેવાના પગલાં લીધાં છે, જેમાં રાજદ્વારી સંબંધો ઘટાડવા, વિઝા સેવાઓ સ્થગિત કરવા અને વેપાર સંબંધો મર્યાદિત કરવાનો સમાવેશ થાય છે. ભારતે 1960ની સિંધુ જળ સંધિને સ્થગિત કરવાની પણ જાહેરાત કરી છે, જેને પાકિસ્તાન યુદ્ધના ખતરા તરીકે જુએ છે. એર્દોઆને બંને દેશોને સંયમ રાખવા અને વાતચીત દ્વારા ઉકેલ શોધવા હાકલ કરી.

જોકે, કેટલાક ભારતીય વિશ્લેષકો અને સોશિયલ મીડિયા વપરાશકર્તાઓએ તુર્કીના આ પગલા પર શંકા વ્યક્ત કરી છે. સુરક્ષા વિશ્લેષક સુશાંત સરીને તુર્કી, ચીન અને અઝરબૈજાનના પાકિસ્તાનને સમર્થન પર નારાજગી વ્યક્ત કરી અને ભારતને આ દેશો સાથે કડક વલણ અપનાવવાની માંગ કરી છે.