ઉપલેટામાં ગઈકાલે બપોર મારબલના વેપારી પોતાના કારખાનેથી ઘરે જમવા આવી રહ્યા હતા ત્યારે નાગનાથ ચોક પાસે પાછળથી આવેલ ડમ્પરે હડફેટે લેતાં વેપારીનું ઘટના સ્થળે કરુણ મોત થતાં વેપારીઆલમમાં શોકનું મોજુ ફરી વળ્યું હતું.
​​​​​​​
પ્રાપ્ત વિગતો મુજબ ગઈકાલે બપોરે બે વાગ્યાના અરસામાં કોલકી રોડ ઉપર ઓમ પાર્કમાં રહેતા રમેશભાઈ અરજણભાઈ દેસાઈ (ઉ.વ.૬૨, જાતે કડવા પટેલ) ગઈકાલે બપોરે પોતાના વાડલા રોડ ઉપર આવેલ મારૂતિ મારબલના કારખાનેથી બપોરે પોતાનું હિરો હોન્ડા મોટર સાયકલ નં.જીજે-૦૩-ડીએલ-૮૮૦૬ લઈને ઘરે આવી રહ્યા હતા ત્યારે ડમ્પરના પાછળના જોટામાં આવી જતાં રમેશભાઈનું માથુ ફાટી જતાં ઘટના સ્થળે કમકમાટીભર્યું મોત થયેલ હતું.
આ ઘટનાની જાણ થતાં જ સિવિલ હોસ્પિટલે વેપારી ઉમટી પડ્યા હતા. મરણજનાર રમેશભાઈને બે ભાઈ અને સંતાનમાં એક દીકરો હોવાનું જાણવા મળેલ છે. આ અંગેની વધુ તપાસ પોલીસ ચલાવી રહી છે.