મહાકુંભ મેળામાં શાહી સ્નાન સિવાય સામાન્ય દિવસોમાં પણ અપેક્ષા કરતાં ઘણી મોટી ભીડ જોવા મળી રહી છે. પ્રયાગરાજની દરેક દિશાઓથી આવતા રસ્તાઓ પર કલાકો સુધી ભારે ટ્રાફિક જામ થયો છે. સંગમ તરફ જતા બધા રસ્તાઓ પર 10 થી 15 કિમી લાંબો ટ્રાફિક જામ છે. વારાણસી, લખનૌ, કાનપુર અને રેવાથી પ્રયાગરાજ સુધીના રૂટ પર વાહનો 25 કિમી સુધી અટવાયેલા રહે છે. સંગમ રેલ્વે સ્ટેશનની બહાર વધુ પડતી ભીડને કારણે વહીવટીતંત્રે સ્ટેશન બંધ કરવાનો નિર્ણય લેવો પડ્યો છે. ઉત્તરી રેલ્વે, લખનૌના સિનિયર ડિવિઝનલ કોમર્શિયલ મેનેજર કુલદીપ તિવારીએ જણાવ્યું હતું કે પ્રયાગરાજ સંગમ સ્ટેશન 14 ફેબ્રુઆરી સુધી બંધ રહેશે.

પ્રયાગરાજ જિલ્લાની સરહદે આવેલા અન્ય જિલ્લાઓમાં પણ ટ્રાફિક જામ છે. પરિસ્થિતિ એવી છે કે દિવસ હોય કે રાત, કાનપુર, બનારસ, જૌનપુર, રેવા, કટની જેવા સરહદી જિલ્લાઓમાં હંમેશા જામ રહે છે.  શહેરના રસ્તાઓ પર ટ્રાફિક જામના કારણે હજારો વાહનો અટવાઈ ગયા છે. દિવસ હોય કે રાત, કલાકો સુધી આ જામથી લોકો પરેશાન રહે છે. સવારે 2 વાગ્યે પણ કાનપુર પ્રયાગરાજ હાઇવેના બામરૌલી, ધુમ્મનગંજ, સુલેમ સરાય, ચૌફટકાના રસ્તાઓ પર જામ છે. પરિસ્થિતિ એવી છે કે આ વિસ્તારોની બંને બાજુના રસ્તાઓ પર વાહનો ઘૂસી રહ્યા છે.

મધ્યપ્રદેશ થઈને ઉત્તર પ્રદેશમાં મહા કુંભ મેળામાં જતા શ્રદ્ધાળુઓના વાહનોને કારણે રાજ્યમાં 200-300 કિલોમીટરનો ભારે ટ્રાફિક જામ થયો હતો, જેના કારણે ગઈકાલે પોલીસને વિવિધ જિલ્લાઓમાં ટ્રાફિક બંધ કરવાની ફરજ પડી હતી. પોલીસ દ્વારા ટ્રાફિક રોકવાના કારણે મુસાફરો કલાકો સુધી રસ્તાઓ પર અટવાઈ ગયા હતા અને તેના કારણે તેમને ઘણી મુશ્કેલીઓનો સામનો કરવો પડ્યો હતો. એક દિવસ પહેલા, ભારે ટ્રાફિક અને ભીડને રોકવા માટે રાજ્યના વિવિધ વિસ્તારોમાં પ્રયાગરાજ તરફ જતા સેંકડો વાહનોને રોકવામાં આવ્યા હતા.

જાણો અખિલેશ યાદવે શું કહ્યું?
સપા નેતા અખિલેશ યાદવે દાવો કર્યો હતો કે પ્રયાગરાજમાં બધે ટ્રાફિક જામ હોવાને કારણે ન તો અનાજ અને શાકભાજી ઉપલબ્ધ છે કે ન તો દવાઓ, પેટ્રોલ અને ડીઝલ. આના કારણે, પ્રયાગરાજ અને મહાકુંભ પરિસરમાં અને પ્રયાગરાજ તરફ જતા રસ્તાઓ પર ફસાયેલા લાખો ભૂખ્યા, તરસ્યા, થાકેલા ભક્તોની હાલત દર કલાકે વધુ ખરાબ થઈ રહી છે. આ ખૂબ જ ગંભીર પરિસ્થિતિ છે. જેમ રાજ્યોમાં બંધારણીય વ્યવસ્થા નિષ્ફળ જાય છે, ત્યારે આદેશ બીજા કોઈને સોંપવામાં આવે છે, તેવી જ રીતે મહાકુંભમાં અરાજકતા જોઈને, કયા સક્ષમ વ્યક્તિને શાસનની કમાન સોંપવી જોઈએ. અસમર્થ લોકો ખોટો પ્રચાર ફેલાવી શકે છે, સાચું સંચાલન નહીં.

સ્ટેશનો પર ઊભા રહેવાની જગ્યા નહિ
મહાકુંભમાં ભક્તોની ભીડ એટલી બધી વધી ગઈ છે કે સ્ટેશનો પર પગ મૂકવાની પણ જગ્યા નથી. ભીડને ધ્યાનમાં રાખીને, સંગમ (દારાગંજ) સ્ટેશન બંધ કરવામાં આવ્યું છે. જયારે પ્રયાગરાજની સરહદે આવેલા જિલ્લાઓ જેમ કે ભદોહી, જૌનપુર, મિર્ઝાપુર, કૌશાંબી, ફતેહપુર, સતના, રેવા, ચિત્રકૂટ, જબલપુર વગેરેમાં ટ્રાફિક જામ છે અને સ્ટેશન પર પગ મૂકવાની પણ જગ્યા નથી.

ટ્રેનમાં ડબ્બામાં જગ્યા ન મળી તો મહિલાઓ એન્જીન ઘુસી 
મહાકુંભમાં જતી ટ્રેનોમાં ભારે ભીડ છે. વારાણસીમાં જગ્યા ન મળતાં મહિલાઓ ટ્રેનના એન્જિનમાં ઘૂસી ગઈ હતી અને અંદરથી એન્જીન બંધ કરી દીધું હતું. મહા મહેનતે પોલીસકર્મીઓ મહિલાઓને બહાર કાઢી હતી. હરદોઈમાં પણ, કોચનો દરવાજો ન ખોલવા પર ગુસ્સે ભરાયેલા ભક્તોએ હોબાળો મચાવ્યો. ટ્રેનમાં મોટા પાયે તોડફોડ થઈ હતી.

રાષ્ટ્રપતિ મુર્મુ આજે મહાકુંભમાં ડૂબકી લગાવશે
આજે, માઘ મહિનાની એકાદશીના શુભ પ્રસંગે, રાષ્ટ્રપતિ દ્રૌપદી મુર્મુ પણ ગંગા સ્નાન માટે પ્રયાગરાજ પહોંચશે. રાષ્ટ્રપતિ ખાસ વિમાન દ્વારા દિલ્હીથી પ્રયાગરાજના બામરૌલી એરપોર્ટ પહોંચશે. ત્યાર બાદ  તે હેલિકોપ્ટર દ્વારા અરૈલ વિસ્તારમાં ડીપીએસ  હેલિપેડ પર ઉતરશે. રાષ્ટ્રપતિ બપોરે ત્રિવેણી સ્નાન માટે પહોંચશે. સ્નાન કર્યા બાદ તે ગંગાની પૂજા અને આરતી કરશે. ત્યારબાદ તે અક્ષયવત અને બડે હનુમાન મંદિરમાં દર્શન કરશે અને પૂજા કરશે. આ સમયગાળા દરમિયાન, સંગમ ખાતે બોટ કામગીરી બંધ રહેશે. 

બાળકો અને વૃદ્ધોની હાલત દયનીય બની
ટ્રાફિક જામના કારણે બાળકો અને વૃદ્ધોની હાલત કફોડી બની ગઈ છે. હરિયાણાના એક યાત્રાળુએ કહ્યું કે અમે મહાકુંભમાં સ્નાન કરવા આવ્યા હતા. અમે છેલ્લા ૩૬ કલાકથી અહીં છીએ અને બહાર નીકળી શકતા નથી. અમારે હરિયાણા જવું છે. ઉત્તર પ્રદેશ સરકાર દ્વારા કહેવામાં આવ્યું હતું કે શ્રદ્ધાળુઓ માટે સંપૂર્ણ વ્યવસ્થા કરવામાં આવી છે. પરંતુ અહીં ટ્રાફિક જામના કારણે લોકોને મુશ્કેલીનો સામનો કરવો પડી રહ્યો છે.