રાજકોટ, લોધિકા અને પડધરી તાલુકાના ૧૮૦ ગામોનું વિશાળ કાર્યક્ષેત્ર ધરાવતા સૌરાષ્ટ્રના સૌથી મોટા એવા રાજકોટ માર્કેટ યાર્ડમાં ઉનાળાના આરંભે લીંબુના ભાવ દાંત ખાટા કરે તેવી સપાટીએ પહોંચ્યા છે, દરમિયાન આજે સવારની હરરાજીમાં પ્રતિ કિલો દીઠ રૂ.૧૭૦ના ભાવે વેંચાણ થયાનું જાણવા મળે છે, હજુ જેમ ગરમી વધશે તેમ લીંબુના ભાવ વધશે.

શાકભાજીમાં સૌથી વધારે મોંઘા લીંબુ
વિશેષમાં રાજકોટ માર્કેટ યાર્ડના ઇન્સ્પેકટર કાનાભાઇ ચાવડાએ જણાવ્યું હતું કે હાલ રાજકોટ માર્કેટ યાર્ડમાં રાજકોટ તાલુકા ઉપરાંત મોરબી, હળવદ અને ભાવનગર સહિતના પંથકમાંથી લીંબુની આવક થઇ રહી છે, ડિમાન્ડ વધતા હાલ રાજકોટ યાર્ડમાં ચેન્નાઇના લીંબુની વાયા અમદાવાદ આયાત પણ શરૂ થઇ છે. એકંદરે હાલ લીંબુમાં આવકની તુલનાએ લેવાલી વધુ હોય સતત ભાવ વધી રહ્યા છે, શાકભાજી વિભાગની જણસીઓમાં હાલ સૌથી મોંઘા લીંબુ છે. જ્યારે અન્ય શાકભાજીમાં ભાવ જળવાયેલા રહ્યા છે. ગત વર્ષે લીંબુના ભાવ એપ્રિલ માસમાં પ્રતિ કિલોના રૂ. ૪૦૦ સુધી પહોંચ્યા હતા