અમદાવાદમાં જે રીતે સીજી રોડ ડેવલપ કરાયો છે તે રીતે હવે રાજકોટના પેડક રોડને ઇસ્ટ ઝોનના ગૌરવપથ તરીકે ડેવલપ કરવામાં આવશે તેવી જાહેરાત કરાઇ હતી અને પ્રોજેક્ટનો બજેટમાં પણ સમાવેશ કરાયો હતો તેમજ ટેન્ડર પણ પ્રસિધ્ધ કરાયું હતું પરંતુ ટેન્ડર પ્રક્રિયા ટલ્લે ચડતા આજ દિવસ સુધી આ પ્રોજેક્ટ શરૂ થઇ શક્યો નથી.

એક વર્ષ પૂર્વે મહાપાલિકાએ ઇ ટેન્ડર પ્રસિધ્ધ કરી પર્સન્ટેજ રેઇટ બેઇઝથી પેડક રોડ રિ-ડેવલપમેન્ટ વિથ કમ્પ્લિટ સ્ટ્રીટ વર્ક કરવા માટે પ્રતિષ્ઠિત કન્સલ્ટન્ટ એજન્સીઓને આમંત્રિત કરી હતી. આ એજન્સીએ પેડક રોડ રિ-ડેવલપમેન્ટ માટેના કામ ઉપરાંત શહેરના અન્ય વિવિધ વિસ્તારોમાં કમ્પ્લિટ સ્ટ્રીટ ડિઝાઇન સાથેના ગૌરવપથ ડેવલપ કરવા માટે ફિઝિબિલિટી રિપોર્ટ તેમજ ડિટેઇલ પ્રોજેક્ટ રિપોર્ટ તૈયાર કરી આપવાની કામગીરી પણ કરવાની હતી પરંતુ ટેન્ડર પ્રક્રિયા ટલ્લે ચડતા હવે આ કામ ક્યારે શરૂ થશે તે કહેવું મુશ્કેલ છે.

ગુજરાત રાજ્ય સરકાર દ્વારા રાજકોટ સહિત રાજ્યના આઠેય મહાનગરોમાં કમ્પ્લિટ સ્ટ્રીટ ડેવલપમેન્ટ સાથેના ગૌરવ પથ ડેવલપ કરવામાં આવનાર છે. એક એવી કલ્પના કે કોઇ પણ રસ્તા ઉપર જે કંઇ સુવિધાઓ હોવી જોઇએ તે તમામ સુવિધાઓ ઉપલબ્ધ હોય. કમ્પ્લિટ સ્ટ્રીટ ડિઝાઇન અનુસાર ડેવલપ થનારા પેડક રોડની હયાત પહોળાઇ ૨૪ મીટર છે અને આ ૨૪ મીટર પહોળાઇના રસ્તાની બન્ને બાજુ ૭-૭ મીટરના કેરેજ વે બનશે. પેડક રોડ ઉપર નવી ફૂટપાથ, ફૂટપાથની બાજુમાં લેન્ડ સ્કેપિંગ, વાહન પાર્કિંગ પ્લેસ, સિનિયર સિટીઝન્સને બેસવા માટે આકર્ષક અને આરામદાયક બેન્ચ, બાળકો માટે રમત ગમતના સાધનો સહિતની અનેકવિધ સુવિધાઓનું નિર્માણ કરાશે.પેડક રોડને નવેસરથી ડામર કાર્પેટ વિગેરે કરાશે જેમાં ગૌરવ પથના ક્રાઇટેરિયા મુજબની કામગીરી કરવામાં આવશે, જેમાં મુખ્યત્વે પેડક રોડની કુલ લંબાઇ અંદાજે ૨૦૦૦ મીટર અને કુલ પહોળાઇ અંદાજે ૨૪ મીટર છે તેના ઉપર એમવી લેન કાર્પેટ ૧૪ મીટર બનાવાશે.રોડની બંને સાઇડ ફૂટપાથ ૨.૨૫ મીટર, પેવર કાર્પેટ અને ફૂટપાથ વચ્ચે બંને સાઇડ ગ્રીનબેલ્ટ ૨.૨૫ મીટર જેવી રહેશે.

ટેન્ડરની ડિઝાઇનમાં ફેરફાર કરવા ટૂંક સમયમાં અધિકારીઓ-પદાધિકારીઓની મિટિંગ મળશે

પેડક રોડ ડેવલપમેન્ટ પ્રોજેક્ટનું ટેન્ડર ટલ્લે ચડતા હવે ટેન્ડરની ડિઝાઇનમાં ફેરફાર કરી નવેસરથી ટેન્ડર પ્રસિધ્ધ કરવા વિચારણા ચાલી રહી છે, દરમિયાન અહીં પ્રશ્ન એવો સર્જાયો છે કે આ પ્રોજેકટની ગ્રાન્ટ રાજ્ય સરકાર તરફથી મળનારી છે અને રાજ્ય સરકારના કમ્પ્લિટ સ્ટ્રીટ ડેવલપમેન્ટ કોન્સેપ્ટ મુજબ ડેવલપમેન્ટ કરવાનું છે આથી ડેવલપમેન્ટની ડિઝાઇનમાં કોઈ ફેરફાર કરવાનું શક્ય બને તેમ નથી ત્યારે હવે આ પ્રોજેક્ટ મામલે નિર્ણય કરવા ટૂંક સમયમાં મહાનગરપાલિકાના અધિકારીઓ, ઇજનેરો અને પદાધિકારીઓની મિટિંગ મળનારી હોવાનું જાણવા મળે છે.