પોરબંદરના બોખીરાથી કુછડી તરફ જતા રસ્તે કેનાલમાં મોટીમાત્રામાં માછલાના શંકાસ્પદ મોત  નિપજ્યા હોવાથી તંત્ર તાત્કાલિક તપાસ કરે તેવી માંગણી સાથે રજૂઆત થઇ છે. 
પોરબંદરના બોખીરા આવાસ યોજનાથી કુછડી તરફ જતા રસ્તે આવેલી કેનાલમાં બુધવારે બપોર બાદ મોટી સંખ્યામાં માછલાઓ મૃત્યુ પામ્યા હોવાથી તેના  મૃતદેહ તરતા હતા. આથી ત્યાંના જીવદયાપ્રેમી અને જાગૃત લોકોએ ‘સેવ પોરબંદર સી’ના ડો. નૂતનબેન ગોકાણીને જાણ કરી હતી. આટલી વિશાળ માત્રામાં માછલા મોતને ભેટવા પાછળનું કારણ કેમિકલ અથવા તો બીજુ કોઇ છે કે કેમ? તે અંગે તપાસ માટેની માંગણી થઇ છે. માછલાના મૃતદેહના સેમ્પલ લઇને તેની ઉંડાણથી તપાસ હાથ ધરવામાં આવે તો જ તેના મોતનું સાચુ કારણ બહાર આવશે તેથી સત્ય હકીકત બહાર લાવવા માંગણી થઇ છે.