લાલબંગલા નજીક ફાઇનાન્સ કંપનીની ઓફીસના હંગામાં પ્રકરણમાં પોલીસ ફરીયાદનો ખાર રાખી કર્મચારીને ફરી ધમકી

જામનગરના નવાગામ ગેડ વિસ્તારમાં રહેતા બે ભાઈઓએ હાઉસિંગ લોનની પતાવટના મામલે ખાનગી ફાઈનાન્સની કંપનીમાં હંગામો મચાવવાના પ્રકરણમાં  નોંધાયેલી ફરીયાદનો ખાર રાખીને એક શખ્સ દ્વારા કર્મચારીને ફરી ધમકી આપવામાં આવતા મામલો પોલીસમાં લઇ જવામાં આવ્યો છે.

જામનગરના ગુલાબનગર રામવાડી ખાતે રહેતા હાર્દિક કાથડભાઇ લૈયા (ઉ.વ.26) નામના કર્મચારીએ ગઇકાલે સીટી-બી ડીવીઝનમાં જામનગરના દિવ્યરાજસિંહ જાડેજા નામના શખ્સ સામે બીએનએસ કલમ 352, 351(3) મુજબ ફરીયાદ નોંધાવી હતી.

ફરીયાદી હાર્દિકભાઇ લૈયા લાલબંગલા ખાતે સ્વસ્તીક એવન્યુ ત્રીજા માળે આવેલ ખાનગી ફાઇનાન્સ કંપનીમાં કલેકશનની નોકરી કરતા હોય અને તેની ઓફીસ ખોલેલ હોય જેથી આરોપીએ અગાઉ ઇન્ડીયા સેલ્ટર ફાઇનાન્સ કોર્પોરેશન લીમીટેડમાં હોમ લોન લીધેલ હોય જે લોનના 9 લાખ ભરવાના બાકી હોય પરંતુ આરોપીને દોઢ લાખમાં સેટલમેન્ટ કરવું હોય જેથી તાજેતરમાં આરોપીએ અહીં માથાકુટ કરી હતી. જે અંગે પોલીસ ફરીયાદ કરવામાં આવી હતી.

દરમ્યાન પોલીસ ફરીયાદ બાબતનો ખાર રાખી આરોપી દિવ્યરાજસિંહ લાલબંગલા ખાતેની ઓફીસે આવીને કહેલ કે ગુલાબનગરથી કોન આવેલ છે જેથી ફરીયાદી હાર્દિકભાઇએ કહેલ કે હું આવેલ છું, દરમ્યાન આરોપીએ ફરીયાદીને કોને પુછીને આ ઓફીસ ખોલી છે તેમ કહીને ફરીયાદીને અપશબ્દો બોલી જો આજ પછી તું આ ઓફીસ ખોલીશ તો તને જાનથી મારી નાખીશ તેવી ધમકી દીધી હતી. આથી હાર્દિકભાઇ દ્વારા સીટી-બીમાં આ મામલે દિવ્યરાજસિંહ જાડેજા સામે ફરીયાદ કરતા પોલીસ દ્વારા તપાસ ચલાવવામાં આવી રહી છે.