જમ્મુ અને કાશ્મીરના મુખ્યમંત્રી ઓમર અબ્દુલ્લાએ વસવસો વ્યક્ત કરતા કહ્યું કે પહેલગામમાં થયેલા આતંકવાદી હુમલાથી માત્ર રાજ્યના અર્થતંત્ર અને પર્યટનને જ ફટકો પડ્યો નથી, પરંતુ પાકિસ્તાનને ફરીથી આંતરરાષ્ટ્રીય સ્તરે કાશ્મીર મુદ્દાને ઉઠાવવાની તક મળી ગઈ છે. આ હુમલાએ ઘણા વર્ષોની મહેનતને બરબાદ કરી દીધી છે, જેના હેઠળ કાશ્મીરમાં પર્યટન અને શાંતિ પુનઃસ્થાપિત કરવાના પ્રયાસો કરવામાં આવી રહ્યા હતા.પહેલગામ હુમલો કાશ્મીરની પ્રગતિ અને શાંતિ માટે મોટો આંચકો છે. થોડા અઠવાડિયા પહેલા સુધી, પહેલગામ પ્રવાસીઓથી ભરેલું હતું, અને પછી આ ભયાનક હત્યાકાંડ થયો.

એક ઇન્ટરવ્યુમાં ઓમર અબ્દુલ્લાએ કહ્યું કે પહેલગામ આતંકવાદી હુમલાએ રાજ્યના અર્થતંત્ર અને રાજદ્વારીમાં વર્ષોની મહેનતનો નાશ કર્યો છે. તેમણે કહ્યું કે આ હુમલો એવા સમયે થયો જ્યારે કાશ્મીરના પર્યટન ઉદ્યોગે ઘણા વર્ષો પછી ગતિ પકડી હતી, પરંતુ હવે બધું ફરી ઠપ્પ થઈ ગયું છે. આપણે એવા તબક્કે આવી ગયા છીએ જ્યાં પાછા ફરીશું તેવું અમે ક્યારેય વિચાર્યું ન હતું. ફરીથી રક્તપાત થયો છે, દુઃખ છે, અશાંતિ છે. બધું બદલાઈ ગયું છે, પણ કંઈ બદલાયું નથી.

આ સમયે ખીણ પ્રવાસીઓથી ભરેલી હોવી જોઈતી હતી પરંતુ અફસોસ...

જ્યારે તેમને પૂછવામાં આવ્યું કે આ પરિવર્તન જમીન પર કેવી રીતે પ્રતિબિંબિત થાય છે, ત્યારે તેમણે કહ્યું, "આ સમયે, ખીણ પ્રવાસીઓથી ભરેલી હોવી જોઈએ. અર્થતંત્રનો વિકાસ થવો જોઈએ, બાળકો શાળાઓમાં હોવા જોઈએ, દરરોજ 50-60 ફ્લાઇટ્સ એરપોર્ટ પર ઉતરતી હોવી જોઈએ. પરંતુ હવે ખીણ ખાલી છે, શાળાઓ બંધ છે, એરપોર્ટ અને એરસ્પેસ બંને બંધ છે.ત્યાં ઉત્સાહ અને જીવન હતું. જ્યાં હવે ભયંક ખાલીપો અને ડરાવણી શાંતિ છે.

પાકિસ્તાને જાણી જોઈને આ કૃત્ય કર્યું

મુખ્યમંત્રીએ ચિંતા વ્યક્ત કરી કે પાકિસ્તાને ફરી એકવાર જાણી જોઈને કાશ્મીર મુદ્દાને આંતરરાષ્ટ્રીય મંચ પર લાવવાનો પ્રયાસ કર્યો છે. તેમણે કહ્યું, "જ્યારે હું કહું છું કે કંઈ બદલાયું નથી - તેનો અર્થ એ છે કે પાકિસ્તાન, કમનસીબે, ફરી એકવાર જમ્મુ અને કાશ્મીરના મુદ્દાને આંતરરાષ્ટ્રીયકરણ કરવામાં સફળ રહ્યું છે. યુનાઇટેડ સ્ટેટ્સ મધ્યસ્થીની ભૂમિકામાં પોતાને સામેલ કરવા આતુર છે. તેમણે એમ પણ કહ્યું કે ભારત અને પાકિસ્તાન વચ્ચે અત્યાર સુધી કોઈક રીતે જળવાઈ રહેલો યુદ્ધવિરામ હવે તૂટી ગયો છે.