જામનગરના બે શખ્સ ફરાર : દિ.પ્લોટ-૫૮માં દારુની ૩ બાટલી મળી, શખ્સ રફુચકકર

જામનગર નજીક સરમત પાટીયા પાછળ આર્ય ભગવતી સોસાયટી, બ્લોક નં. ૧૬૧માં ઇંગ્લીશ દારુ રાખ્યો હોવાની બાતમીના આધારે સિકકા પોલીસે દરોડો પાડીને જામનગરના ગોકુલનગરમાં રહેતા શખ્સને ઇંગ્લીશ દારુના ૩૮૪ ચપટા અને મોબાઇલ સાથે પકડી લીધો હતો જેમાં બે શખ્સની સંડોવણી ખુલી હતી, જયારે શહેરના દિ.પ્લોટ-૫૮માંથી ઇંગ્લીશ દારુની ૩ બોટલ કબ્જે લેવાઇ હતી જયારે આરોપી ફરાર થઇ ગયો હતો.
જામનગરના ગોકુલનગર શેરી નં. ૭માં રહેતો સાહીલ ધીરુ સોજીત્રા નામના શખ્સે સરમત પાટીયા પાછળ ભગવતી સોસાયટીમાં મકાને વિદેશી દારુ રાખ્યો હોવાની બાતમી સિકકા પોલીસને મળી હતી જેના આધારે દરોડો પાડીને ઇંગ્લીશ દારુના ૩૮૪ ચપટા કિ. રુા. ૩૮૪૦૦ તથા ૪ હજારની કિંમતનો એક મોબાઇલ સાથે સાહીલને દબોચી લીધો હતો.
તપાસ દરમ્યાન જામનગરના સાંઢીયા પુલ સામે આવેલ સરદારનગર શેરી નં. ૯માં રહેતા સાગર બિપીન ચાવડા અને સાયોના શેરીમાં રહેતા કિશન ઉર્ફે તોતો કોળી આ બંનેની સંડોવણી ખુલી હતી આથી ત્રણેય વિરુઘ્ધ પ્રોહી મુજબ ગુનો દાખલ કરવામાં આવ્યો હતો. દરોડાની કાર્યવાહી સિકકા પીએસઆઇ આર.એચ. બાર અને સ્ટાફ દ્વારા કરવામાં આવી હતી.
બીજા દરોડામાં જામનગરના દિ.પ્લોટ ૫૮માં શ્રી રેસીડેન્સી ત્રીજા માળે ફલેટ નં. ૩૦૧માં રહેતા યોગેશ ઉર્ફે યોગલો બાડો કિશોર દામા નામના શખ્સે પોતાના ભોગવટાના ફલેટમાં વિદેશી દારુ વેચાણ અર્થે રાખ્યો છે એવી વિગતોના આધારે સીટી-એ પોલીસે દરોડો પાડીને ઇંગ્લીશ દારુની ૩ બોટલ કબ્જે લીધી હતી, જયારે આરોપી રફુ ચકકર થઇ ગયો હતો. જેની શોધખોળ ચલાવવામાં આવી રહી છે.