ગયા વર્ષે જૂનથી અવકાશમાં ફસાયેલી સુનિતા વિલિયમ્સની પૃથ્વી વાપસીની રાહ આખરે પૂરી થતી હોય તેવું લાગે છે. નાસાએ આ અંગે એક મોટી અપડેટ જારી કર્યું છે. આ એતિહાસીક ઘટનાનું નાસા લાઈવ પ્રસારણ પણ કરશે.

નવ મહિનાથી વધુ સમયથી ઇન્ટરનેશનલ સ્પેસ સ્ટેશન પર ફસાયેલી સુનિતા વિલિયમ્સ જલ્દી જ પરત આવી રહી છે. નેશનલ એરોનોટિક્સ એન્ડ સ્પેસ એડમિનિસ્ટ્રેશનએ જણાવ્યું હતું કે સુનિતા વિલિયમ્સ અને તેમના સાથીદાર બુચ વિલ્મોર 18 માર્ચ, મંગળવારની સાંજે પૃથ્વી પર પાછા ફરશે. રવિવારે, સ્પેસએક્સનું અવકાશયાન ક્રૂ-10 બે અવકાશયાત્રીઓને પૃથ્વી પર પાછા લાવવા માટે આંતરરાષ્ટ્રીય અવકાશ મથક પર પહોંચ્યું હતું. આ પછી, ભારતીય મૂળની સુનિતા વિલિયમ્સ માટે ઘરે પાછા ફરવાનો માર્ગ ખુલ્યો છે.

નાસાએ એક નિવેદન જારી કરીને કહ્યું કે ક્રૂ-10નું સમુદ્રમાં સ્પ્લેશડાઉન મંગળવારે સાંજે લગભગ 5:57 વાગ્યે થશે. એટલે કે સુનિતા વિલિયમ્સ ૧૯ માર્ચે ભારતીય સમય મુજબ સવારે ૩:૩૦ વાગ્યે પૃથ્વી પર પરત ફરશે.અગાઉ તેમના પરત ફરવાનો સમય બુધવારનો નક્કી કરવામાં આવ્યો હતો. જો કે, હવામાનનો અંદાજ કાઢ્યા પછી, તે વહેલું નક્કી કરવામાં આવ્યું છે. નાસાએ કહ્યું છે કે પરિસ્થિતિ પર સતત નજર રાખવામાં આવી રહી છે.

ભારતીય સમય મુજબ કાલે સવારે 8:30 વાગ્યે કાર્યક્રમ શરુ
નાસાએ પોતાના નિવેદનમાં જણાવ્યું હતું કે તે એજન્સીના સ્પેસએક્સ ક્રૂ-9 ના ઇન્ટરનેશનલ સ્પેસ સ્ટેશન પરથી પૃથ્વી પર પાછા ફરવાનું જીવંત પ્રસારણ કરશે. આ કાર્યક્રમ સોમવાર, 17 માર્ચના રોજ રાત્રે 10:45 વાગ્યે શરૂ થશે, એટલે કે, ભારતમાં 18 માર્ચના રોજ સવારે 8:30 વાગ્યે. તે ડ્રેગન અવકાશયાન હેચ ક્લોઝર માટેની તૈયારીઓથી શરૂ થશે. નિક હેગ અને રોસકોસ્મોસ અવકાશયાત્રી એલેક્ઝાન્ડર ગોર્બુનોવ, જેઓ સુનિતા અને બુચ વિલ્મોરને લાવવા માટે ઇન્ટરનેશનલ સ્પેસ સ્ટેશન ગયા હતા, તેઓ પણ ડ્રેગન કેપ્સ્યુલ પર પાછા ફરશે.

નોંધનીય છે કે સુનિતા વિલિયમ્સ અને બુચ વિલ્મોર જૂન 2024માં બોઇંગ સ્ટારલાઇનરમાં અવકાશમાં પહોંચ્યા હતા. આ મિશન ફક્ત એક અઠવાડિયા માટે હતું. જો કે, અવકાશયાનમાં ખામી સર્જાવાને કારણે તેમનું પરત ફરવાનું મુલતવી રાખવામાં આવ્યું હતું. આ દરમિયાન, સુનિતા વિલિયમ્સના સ્વાસ્થ્ય અંગે પણ ઘણી ચિંતાઓ વ્યક્ત કરવામાં આવી હતી. જોકે, હવે તે સુરક્ષિત રીતે પૃથ્વી પર પરત ફરી રહી છે.