કચ્છના ભુજ-મુન્દ્રા રોડ વચ્ચે આવતા કેરા ગામ નજીક ખાનગી ટ્રાવેલ્સની મિની લક્ઝરી બસ અને ટ્રેલર વચ્ચે ગંભીર અકસ્માત સર્જાતા 7 લોકોના મૃત્યુ થયા છે અને 4 જેટલા લોકો ગંભીર રૂપથી ઘાયલ થયા છે. મૃત્યુ આંક વધવાની શક્યતા છે. જેના કારણે પોલીસના ઉચ્ચ અધિકારીઓ પણ ઘટનાસ્થળે પહોંચ્યા છે. બસમાં સવાર 40 પૈકી 5થી વધુ લોકોના ઘટનાસ્થળે મોત થયા છે તો અકસ્માતમાં ઈજાગ્રસ્ત લોકોને હોસ્પિટલ ખસેડાયા છે.​​​​​​​

બપોરના સમયે ગંભીર અકસ્માત સર્જાયો
મળતી માહિતી અનુસાર કન્ટેનરને ઓવરટેક કરવા જતા મિની બસને ઝાંખા કઢા પાસે અકસ્માત નડ્યો હતો. જેમાં કન્ટેનર સાથે ટકરાતા બસની આગળનો આખો ભાગ તૂટી ગયો હતો અને લાશો રોડ પર વિખેરાઈ હતી. મિની બસમાં 40 લોકો જઈ રહ્યા હતા. ત્યારે બપોરના સમયે ગંભીર અકસ્માત થયો હતો. ઘટનામાં 7 લોકોના ઘટનાસ્થળે જ મોત થયા છે. જ્યારે કેટલાક મુસાફરો ઈજાગ્રસ્ત થયા છે.

​​​​​​​બસ અને ટ્રકની સામસામે ટક્કર થઈ 
પ્રાપ્ત વિગત મુજબ, ઘટનાની જાણ થતાની સાથે પોલીસનો કાફલો ઘટનાસ્થળે પહોંચ્યો હતો તો બીજી તરફ ટ્રક અને બસ સામસામે આવી જતા આ ઘટના બની હોવાની વાત સામે આવી છે, ત્યારે પોલીસે સમગ્ર ઘટનાને લઈ આસપાસના લોકોના નિવેદન લીધા છે અને મૃતકોની ઓળખને લઈ પરિવારનો સંપર્ક કરવાનો પ્રયત્ન કર્યો છે, તમામ મૃતદેહને પીએમ માટે હોસ્પિટલમાં મોકલી આપવામાં આવ્યા છે અને મૃતદેહના પીએમ બાદ પરિવારજનોને મૃતદેહ સોંપવામા આવશે.

પોલીસે સીસીટીવીના આધારે તપાસ હાથ ધરી  
ઘટનાને લઈ પોલીસે સીસીટીવી પણ તપાસ માટે લીધા છે, ટ્રક ચાલકનો વાંક હતો કે બસ ચાલકનો વાંક હતો તેને લઈ તે દિશામાં તપાસ શરૂ કરી છે. ઘટના બનતાની સાથે જ ટ્રાફિકજામના દ્વશ્યો સર્જાયા હતા અને દૂર-દૂર સુધી વાહનોની લાઈનો લાગી હતી, પોલીસે તમામ મૃતદેહને ખસેડીને રોડ પરનો ટ્રાફિક ખુલ્લો કર્યો હતો, મૃતકો તમામ કચ્છના છે કે બહારના જિલ્લાના છે તેની કોઈ માહિતી હાલમાં સામે આવી નથી.