આજીડેમની પાસેના વિસ્તારમાં રહેતી સગીરા સોડા લેવા જવાનું કહી ઘરેથી નીકળ્યા બાદ ઘરે પરત ન ફરતા આજીડેમ પોલીસે આ અંગે અપહરણનો ગુનો નોંધી સગીરાના સગડ મેળવવા શોધખોળ શરૂ કરી છે.

મૂળ અમરેલી હાલ રાજકોટમાં આજીડેમ પાસેના વિસ્તારમાં રહેતા અને કારખાનામાં મજૂરી કામ કરનાર યુવાને પોતાની ૧૭ વર્ષની દીકરી ગુમ થયાની ફરિયાદ આજીડેમ પોલીસ સ્ટેશનમાં નોંધાવી છે. આજીડેમ પોલીસ સ્ટેશનમાં નોંધાવેલ ફરિયાદ મુજબ, બપોરના ત્રણેક વાગ્યાની આસપાસ સગીરાએ માતાને સોડા પીવાનું પૂછેલ હતું પરંતુ માતાએ મારે સોડા નથી પીવી તું તારા માટે લઈ આવ આવું કહેતા સગીરા એકલી કોઠારીયા સોલવન્ટ ફાટક પાસે આવેલ દુકાનેથી સોડા લેવા જવાનું કહી ઘરેથી નીકળેલ હતી.

પરંતુ વધુ સમય લાગવા છતાં ઘરે પરત ન ફરતા સગીરાની માતા તપાસ કરવા દુકાને ગયેલ પરંતુ કોઈ ભાળ ન મળતા આજુબાજુ તથા સગા સબંધીઓ તપાસ કરતા દીકરીનો કોઇ પતો લાગ્યો ન હતો. જેથી પોલીસને સગીરાના પિતાએ જાણ કરતા પોલીસે અપહરણનો ગુનો નોંધી સગીરાના સગડ મેળવવા શોધખોળ શરૂ કરી છે.