રાજ્યમાં વરસાદી માહોલ જામ્યો છે. ત્યારે છેલ્લા 10 કલાકમાં 100 તાલુકામાં વરસાદ ખાબક્યો છે. ગણદેવીમાં સૌથી વધુ 4 ઈંચ વરસાદ ખાબક્યો છે. 

વિગતવાર વાત કરીએ તો આગામી પાંચ દિવસ રાજ્યમાં વરસાદી માહોલ રહેશે. જેમાં સુરત, ડાંગ, તાપી અને નવસારીમાં અતિભારે વરસાદની આગાહી છે. ગતઈકાલથી નવસારીમાં જિલ્લામાં મેઘરાજા મન મૂકીને વરસી રહ્યા છે. જિલ્લાના ચાર તાલુકાઓમાં પાંચ ઇંચથી વધુ વરસાદ નોંધાયો છે. ભારે વરસાદથી ખરસાડ ગામમાં જળબંબાકાર સાથે સવારથી વીજ કાપની સ્થિતિનું નિર્માણ થયાનું સામે આવ્યું છે. 

અમદાવાદમાં બપોરે અનેક વિસ્તારમાં વરસાદ પડ્યો

હવામાન વિભાગની આગાહી અનુસાર અમદાવાદમાં વરસાદ વરસ્યો છે. જેમાં થલતેજ, સિંધુ ભવન, જોધપુર, પ્રહલાદનગર, સેટેલાઇટ, એસ.જી.હાઇવે, વેજલપુર સહિત અનેક વિસ્તારમાં વરસાદ વરસ્યો હતો. અડધો કલાક આવેલા વરસાદના કારણે નીચાણવાલા વિસ્તારમાં વરસાદી પાણી ભરાયાના દ્રશ્યો સામે આવ્યા હતા.

દક્ષિણ ગુજરાતમાં ભારે વરસાદની આગાહી

દક્ષિણ ગુજરાતમાં હજૂ પણ ભારે વરસાદની આગાહી છે. જેમાં વાત કરીએ તો નવસારી, વલસાડ, દમણ, દાદરા નગર હવેલીમાં ભારે વરસાદની આગાહી હવામાન વિભાગ દ્વારા કરવામાં આવી છે. ઈ ઉપરાંત નર્મદા, ભરૂચ, સુરત, ડાંગ, તાપી સહિતના વિસ્તારોમાં ઓરેન્જ એલર્ટ આપવામાં આવ્યુ છે. જ્યારે અરવલ્લી, ખેડા, અમદાવાદ, દાહોદ સહિતના વિસ્તારોમાં પણ ઓરેન્જ એલર્ટ છે. આવતીકાલે પણ રાજ્યના કેટલાક ભાગોમાં રેડ એલર્ટ સાથે ભારે વરસાદની ચેતવણી છે.