સ્પ્રિંગ રોલ્સ એ સરળતાથી ઉપલબ્ધ નાસ્તો છે જે મોટાભાગના લોકો ખાવાનું પસંદ કરે છે. જો હંમેશા બજારમાંથી ખરીદીને સ્પ્રિંગ રોલ્સ ખાવાનું ગમે છે, તો એકવાર ઘરે બનાવવાની પણ ટ્રાય કરી જુઓ. ઘરે બનાવેલા સ્પ્રિંગ રોલ્સનો સ્વાદ પણ અદ્ભુત હોય છે અને ઘરે બનાવેલ સ્ટફિંગ સ્વાદિષ્ટ હોય છે. જાણો દેશી સ્ટફિંગથી સ્પ્રિંગ રોલ્સ બનાવવાની રીત:

સ્પ્રિંગ રોલ્સ બનાવવા માટેની સામગ્રી:

- બે કપ મેંદો

- બે ચમચી મકાઈનો લોટ

- ૪-૫ કળી બારીક સમારેલું લસણ

- બે લીલા મરચાં બારીક સમારેલા

- એક ડુંગળી સમારેલી

- ૧ ગાજર લંબાઈમાં કાપેલું

- બે કપ સમારેલી કોબીજ

- ૧ નાનું કેપ્સિકમ સમારેલું

- બે ચમચી વિનેગર

- બે ચમચી સોયા સોસ

- બે ચમચી ચીલી સોસ

- અડધી ચમચી કાળા મરી પાવડર

- મીઠું

- ૧/૨ કપ મેંદાની પેસ્ટ

- તેલ

સ્પ્રિંગ રોલ્સ કેવી રીતે બનાવવા

સ્પ્રિંગ રોલ્સ બનાવવા માટે, સૌપ્રથમ એક મોટા બાઉલમાં 2 કપ મેંદાનો લોટ, 2 ચમચી મકાઈનો લોટ અને મીઠું મિક્સ કરો. પછી, તેમાં પાણી ઉમેરો અને તેને સારી રીતે મિક્સ કરો અને બેટર તૈયાર કરો. હવે શીટ(પડ) બનાવવા માટે તવાને ગ્રીસ કરો અને ગરમ તવા પર એક ચમચો બેટર રેડો. મિશ્રણ સરખી રીતે ફેલાય તે માટે એકવાર હલાવો. પછી તેને રાંધો. બધી શીટ્સ એ જ રીતે બનાવો. હવે સ્ટફિંગ તૈયાર કરો. આ માટે પહેલા એક મોટા પેનમાં 2 ચમચી તેલ ગરમ કરો. લસણ, મરચું નાખીને સાંતળો. પછી અડધી ડુંગળી નાખીને તેને ઉંચા તાપ પર શેકો. હવે તેમાં ગાજર, કોબી, કેપ્સિકમ ઉમેરો અને હળવા હાથે સાંતળો. હવે તેમાં વિનેગર, સોયા સોસ, ચીલી સોસ, કાળા મરી પાવડર અને મીઠું ઉમેરો. તેને સારી રીતે મિક્સ કરો. સ્ટફિંગ તૈયાર છે.

સ્પ્રિંગ રોલ્સ બનાવવા માટે પહેલા એક તૈયાર શીટ લો અને તેના પર એક ચમચી તૈયાર વેજ સ્ટફિંગ મૂકો. કિનારીઓ પર એક ચમચી લોટની પેસ્ટ લગાડો. હવે કિનારીઓને રોલ કરો અને ફોલ્ડ કરો. ખાતરી કરો કે રોલ યોગ્ય રીતે સીલ થયેલ છે. હવે ગરમ તેલમાં ધીમા તાપે તળો. ગોલ્ડન બ્રાઉન અને ક્રિસ્પી થાય ત્યાં સુધી શેકો. પછી તેને ટીશ્યુ પેપર પર કાઢી, કાપીને સર્વ કરો.