ગીર સોમનાથના કોડીનાર નજીકના માઢવાડ બંદરે એક દુઃખદ ઘટના બની છે. આજે બે યુવાનો દરિયામાં ન્હાવા ગયા હતા, પરંતુ કમનસીબે તેઓ ડૂબી ગયા છે.

મળતી માહિતી મુજબ સાહિલ પાંજરી અને દેવરાજ ગોહિલ નામના બે યુવાનો ટગ બોટ લઈને દરિયામાં ન્હાવા માટે ગયા હતા. જો કે, અચાનક બોટ પલટી જતાં આ દુર્ઘટના સર્જાઈ હતી.

ઘટનાની જાણ થતાં જ સ્થાનિક અધિકારીઓ અને પોલીસ તાત્કાલિક ઘટનાસ્થળે દોડી આવ્યા હતા. સ્થાનિક તરવૈયાઓની મદદથી ડૂબેલા યુવાનોની શોધખોળ શરૂ કરવામાં આવી છે. આ ઉપરાંત ફાયર બ્રિગેડની ટીમને પણ જાણ કરવામાં આવી છે.

બનાવની જાણ થતાં જ આસપાસના લોકો મોટી સંખ્યામાં દરિયા કિનારે એકઠા થઈ ગયા હતા અને યુવાનોની શોધખોળમાં મદદ કરી રહ્યા છે. હાલમાં યુવાનોના મૃતદેહોને શોધવાના પ્રયાસો ચાલુ છે. આ ઘટનાથી સમગ્ર વિસ્તારમાં શોકની લાગણી છવાઈ ગઈ છે.