કોલકાતા નાઈટ રાઈડર્સે મુંબઈ ઈન્ડિયન્સને 18 રને હરાવ્યું છે. 158 રનના ટાર્ગેટનો પીછો કરતી વખતે મુંબઈએ એક સમયે 5 ઓવરમાં કોઈ વિકેટ લીધા વિના 59 રન બનાવી લીધા હતા. તેમ છતાં તે લક્ષ્યનો પીછો કરી શકી નહોતી.

ઈન્ડિયન પ્રીમિયર લીગ 2024ની 60મી મેચ કોલકાતા નાઈટ રાઈડર્સ અને મુંબઈ ઈન્ડિયન્સ વચ્ચે રમાઈ હતી. મેચમાં મુંબઈની ટીમે ટોસ જીતીને પ્રથમ બોલિંગ કરવાનો નિર્ણય લીધો હતો. પ્રથમ બેટિંગ કરતા KKRની ટીમે 157 રન બનાવ્યા હતા. 

158 રનના ટાર્ગેટનો પીછો કરતા મુંબઈએ એક સમયે 5 ઓવરમાં કોઈ વિકેટ વિના 59 રન બનાવી લીધા હતા, પરંતુ તે પછી KKRના સ્પિનરોએ રનની ગતિ પર અંકુશ મૂક્યો હતો અને નિયમિત અંતરે વિકેટો લીધી હતી. 

વરસાદ વિક્ષેપિત આ મેચમાં કોલકાતાએ પહેલા રમતા 16 ઓવરમાં 157 રન બનાવ્યા હતા. તેના જવાબમાં મુંબઈ ઈન્ડિયન્સ માત્ર 139 રન જ બનાવી શકી હતી. ઈશાન કિશને 22 બોલમાં 40 રન બનાવ્યા હતા. જ્યારે તિલક વર્માએ 17 બોલમાં 32 રનની ઇનિંગ રમી હતી. KKR તરફથી હર્ષિત રાણા, વરુણ ચક્રવર્તી અને આન્દ્રે રસેલે બે-બે વિકેટ લીધી હતી.