છેલ્લા કેટલાક દિવસોમાં, અમેરિકામાં કેટલાય ભારતીય વિદ્યાર્થીઓને તેમના ડેઝિગ્નેટેડ સ્કૂલ ઓફિસર્સ (ડીએસઓ) તરફથી ઇમેઇલ મળ્યા હતા, જેમાં કહેવામાં આવ્યું હતું કે તેમના એફ-1 સ્ટુડન્ટ વિઝા હવે માન્ય નથી અને તેમને તાત્કાલિક દેશ છોડી દેવાનો નિર્દેશ આપવામાં આવ્યો હતો. આ ઈમેઈલમાં વિદ્યાર્થીઓ પરના અગાઉના ગુનાહિત આરોપો - લેન બદલવા અને દારૂ પીને વાહન ચલાવવાથી લઈને દુકાનમાં ચોરી કરવા સુધીના - કારણો ટાંકીને વિઝા રદ કરવામાં આવ્યા હોવાનું કહેવાયું છે.

30 માર્ચે સૌપ્રથમ અહેવાલ પ્રાપ્ત થયો હતો કે અમેરિકામાં સેંકડો આંતરરાષ્ટ્રીય વિદ્યાર્થીઓને કેમ્પસ એક્ટિવિઝમને કારણે સ્વ-દેશનિકાલ કરવાનું કહેતા ઇમેઇલ મળી રહ્યા છે. ઇમિગ્રેશન વકીલોએ જણાવ્યું હતું કે વિદ્યાર્થીઓએ સોશિયલ મીડિયા પોસ્ટ શેર કરવા જેવી નાની બાબત માટે પણ તેમના વિઝા ગુમાવ્યા છે.

ઇમેઇલમાં લખ્યું હતું કે તમારા એસઈવીઆઈએસ (સ્ટુડન્ટ એન્ડ એક્સચેન્જ વિઝિટર ઇન્ફર્મેશન સિસ્ટમ, એક કાનૂની દસ્તાવેજ જે ઇમિગ્રન્ટનો ડેટા સંગ્રહિત કરે છે અને તેમની કાનૂની સ્થિતિ સાબિત કરે છે) રેકોર્ડને સમાપ્ત કરવાનો અર્થ એ છે કે તમારી પાસે હવે માન્ય એફ-1 નોન-ઇમિગ્રન્ટ સ્ટેટસ નથી. આનો અર્થ એ છે કે તમને હવે કાયદેસર રીતે યુએસમાં રહેવાની મંજૂરી નથી. ફરી એકવાર, તમારું ફોર્મ આઈ-20 હવે માન્ય નથી. તમારું ઈએડી (રોજગાર અધિકૃતતા દસ્તાવેજ) હવે માન્ય નથી અને તમારી પાસે હવે કામ કરવાની અધિકૃતતા નથી.

તેમાં કહેવામાં આવ્યું છે કે જો તમારા વિઝા રદ કરવામાં આવ્યા છે તો તેનો અર્થ એ કે તમારા પાસપોર્ટમાંનો એફ-1 વિઝા હવે માન્ય નથી. જો તમે યુએસમાં છો તો તમારે તાત્કાલિક અહીંથી નીકળવાની યોજના બનાવવાની જરૂર પડી શકે છે. મિઝોરી, ટેક્સાસ અને નેબ્રાસ્કા સહિત અન્ય રાજ્યોની યુનિવર્સિટીઓમાં અભ્યાસ કરતા ભારતીય વિદ્યાર્થીઓને તાજેતરમાં ઇમેઇલ મળ્યા છે.

ડિપાર્ટમેન્ટ ઓફ હોમલેન્ડ સિક્યુરિટી અનુસાર આ દરેક ગુનાઓ દેશનિકાલમાં પરિણમી શકે છે પરંતુ યુ.એસ.માં ઇમિગ્રેશન એટર્નીઓ કહે છે કે ભૂતકાળમાં તેઓ ભાગ્યે જ દેશનિકાલમાં પરિણમતા હતા. "દારૂ પીને વાહન ચલાવવા, લેન બદલવા અથવા વધુ પડતી ઝડપે વાહન ચલાવવા જેવા ગુનાઓ માટે સેવિસ(એસઈવીઆઈએસ) રદ કરવું અત્યંત દુર્લભ છે. આ વાત ટેક્સાસ ઇમિગ્રેશન એટર્ની ચાંદ પરાવથાનેનીએ જણાવી હતી કે જેઓ હાલમાં આવા લગભગ 30 કેસ સંભાળી રહ્યા છે. તેમણે કહ્યું કે છેલ્લા ચાર દિવસમાં, સમાન પરિસ્થિતિમાં રહેલા ભારતીય વિદ્યાર્થીઓ તરફથી ઘણા ફોન આવ્યા છે.

યુએસ સ્થિત કન્સલ્ટન્સી - યુએસ એડમિશનના રવિ લોથુમલ્લા જે આંતરરાષ્ટ્રીય વિદ્યાર્થીઓને કોલેજ પ્રવેશ, નોકરીઓ અને કાનૂની બાબતોમાં મદદ કરે છે, તેમણે ધ્યાન દોર્યું કે વિદ્યાર્થીઓમાં દુકાનમાં ચોરી અને નશામાં વાહન ચલાવવા જેવા ગુનાઓ સામાન્ય છે પણ અમેરિકામાં તેને ગંભીર માનવામાં આવે છે. તેમણે કહ્યું કે વિદ્યાર્થીઓને યુએસમાં આવતા પહેલા તેમની ગેરકાયદેસરતા વિશે સ્પષ્ટપણે જાણ કરવામાં આવે છે. લોથુમલ્લાએ જણાવ્યું કે જોકે, આ પહેલી વાર છે જ્યારે આવા ગુનાઓ માટે સેવિસ રદ કરવામાં આવી રહ્યું છે. આમાંના ઘણા કેસો એક વર્ષથી વધુ જૂના છે અને તેનો ઉકેલ આવી ચૂક્યો છે. વિદ્યાર્થીઓએ તાત્કાલિક ઇમિગ્રેશન વકીલોની સલાહ લેવી જોઈએ, કારણ કે કેટલાક પાસે હજુ પણ રદ કરવાની તક હોઈ શકે છે