સાઉથવેસ્ટ મોનસુન એટલે કે નૈઋત્યનું ચોમાસુ હજુ કેરળમાં પહોંચ્યું નથી અને કેરળ પહોંચતા તેને હજુ ત્રણથી ચાર દિવસ લાગે તેમ છે.કેરળમાં નૈઋત્યનું ચોમાસું પહોંચ્યા પછી દેશના અન્ય રાજ્યોમાં વરસાદ આવતો હોય છે. પરંતુ આ વખતે અરબી સમુદ્રમાં સર્જાયેલી સિસ્ટમના કારણે આજથી ચાર દિવસ માટે ગુજરાત સહિત દેશના અનેક રાજ્યોમાં તોફાની પવન, મેઘગર્જના સાથે ભારેથી અતિ ભારે વરસાદની ચેતવણી આપવામાં આવી છે. દક્ષિણ ભારતના રાજ્યોમાં તો સાત દિવસ માટે આવું એલર્ટ આપવામાં આવ્યું છે.

રેગ્યુલર ચોમાસુ શરૂ થાય તે પહેલાંના બોનસ 

રેગ્યુલર ચોમાસુ શરૂ થાય તે પહેલાંના બોનસ જેવા આ વરસાદમાં આજે સવારે 5:30 વાગ્યે અરબી સમુદ્રના ઇસ્ટ સેન્ટ્રલ ભાગમાં અપર એર સાયક્લોનિક સર્ક્યુલેશન છવાઈ ગયું છે. હવામાન ખાતાના નિષ્ણાતોના જણાવ્યા મુજબ આવી સિસ્ટમ બન્યા પછી તે ઓછામાં ઓછા 24 કલાકમાં લો પ્રેસરમાં તબદીલ થતી હોય છે. પરંતુ અરબી સમુદ્રની આ સિસ્ટમ એટલી પ્રભાવશાળી છે કે માત્ર 12 કલાક જેટલા ટૂંકા સમયગાળામાં એ લો પ્રેશરમાં પરિવર્તિત થઈ જશે. લો પ્રેશરમાં ફેરવાયા પછી 36 કલાકમાં આ સિસ્ટમ ડિપ્રેશનમાં ફેરવાઈ જશે. આ સિસ્ટમની અસરના ભાગરૂપે ગુજરાત મહારાષ્ટ્ર ગોવા કર્ણાટક અને કેરલાના દરિયામાં વાદળોના ગંજ ખડકાયા છે.

અરબી સમુદ્રની આ સિસ્ટમના કારણે સૌરાષ્ટ્ર કચ્છમાં ભારે વરસાદની ચેતવણી

અરબી સમુદ્રની આ સિસ્ટમના કારણે સૌરાષ્ટ્ર કચ્છ સહિત ગુજરાતમાં આજથી વરસાદની ચેતવણી આપવામાં આવી છે અને આગામી તારીખ 24 સુધી ભારેથી મધ્યમ વરસાદ માટે એલર્ટ અપાયું છે. તારીખ 23 અને 24 ના રોજ સૌરાષ્ટ્ર કચ્છમાં વરસાદનું વધુ જોર રહેશે.

તેલંગાણામાં સાત દિવસ માટે ભારે વરસાદની આગાહી 

ગુજરાત ઉપરાંત કેરલા કર્ણાટક આંધ્ર પ્રદેશ તમિલનાડુ લક્ષદીપ પુડીચેરી તેલંગાણામાં સાત દિવસ માટે ભારે વરસાદની આગાહી કરવામાં આવી છે, અરબી સમુદ્રની આ સિસ્ટમ કર્ણાટક નજીક જનરેટ થઈ હોવાથી કર્ણાટકમાં અતી ભારે વરસાદનું એલર્ટ આપવામાં આવ્યું છે.

હવામાન વિભાગે કોકણ ગોવા મહારાષ્ટ્ર આસામ મેઘાલય નાગાલેન્ડ મણીપુર મિઝોરમ ત્રિપુરા પશ્ચિમ બંગાળ છત્તીસગઢ ઓરિસ્સા, બિહાર મધ્યપ્રદેશ હિમાચલ પ્રદેશ ઉત્તરાખંડ પંજાબ હરિયાણા ચંદીગઢ ઉત્તર પ્રદેશ અને રાજસ્થાનમાં પણ વરસાદ માટે આગાહી કરી છે. ઉતરાખંડમાં તારીખ 23 અને 24 ના અતિ ભારે વરસાદની ચેતવણી આપવામાં આવી છે.

ચાર-પાંચ દિવસમાં કેરળ પહોંચશે ચોમાસું

હવામાન વિભાગે માહિતી આપી હતી કે આગામી 4-5 દિવસમાં કેરળમાં ચોમાસાના આગમન માટે પરિસ્થિતિઓ અનુકૂળ બનવાની શક્યતા છે. આગામી 3 દિવસ દરમિયાન ઉત્તરપૂર્વ ભારત, ઉપ-હિમાલયી પશ્ચિમ બંગાળ અને સિક્કિમમાં વાવાઝોડા અને વીજળી સાથે ભારેથી અતિ ભારે વરસાદની સંભાવના છે. હવામાન વિભાગે એમ પણ કહ્યું છે કે 20 થી 26 મે દરમિયાન પશ્ચિમ કિનારા (કર્ણાટક, કોંકણ અને ગોવા અને કેરળ) અને દ્વીપકલ્પીય ભારતમાં ભારેથી અતિ ભારે વરસાદની સંભાવના છે.