તું ફિલ્ડમાં કેમ જતો નથી ? અને ફિલ્ડમાં જાય છે તો સાંજ સુધી પાછો આવતો નથી ? તારો જવાબ દેવાનો એટીટ્યુડ કાઢી નાખજે ફાઇનાન્સ કંપનીના સુપરવાઈઝરે સાથે કામ કરતા લોન ઓફિસરની બોચી પકડી આજે તો તને મારી જ નાખવો છે કહી જ્ઞાતિ પ્રત્યે હડધૂત કરતા કર્મચારી યુવકે ગાંધીગ્રામ પોલીસમાં સુપરવાઈઝર યુવરાજસિંહ જાડેજા સામે ફરિયાદ નોંધાવતા પોલીસે એટ્રોસિટી એક્ટ સહિતની કલમ હેઠળ ગુનો નોંધ્યો છે.

આજ તો તને મારી જ નાખવો છે 
મૂળ પોરબંદરના છાયાનો વતની અને શહેરના ભગતસિંહ ગાર્ડન પાસેના આવાસ ક્વાર્ટરમાં ભાડેથી રહેતો અને માધાપર પાસે આવેલી એસએમએફજી ફાઇનાન્સ કંપનીમાં લોન ઓફિસર તરીકે ફરજ બજાવતો નિલેશ વાલજીભાઇ રાઠોડ (ઉ.વ.32)નો યુવક ગઈકાલે સવારે ઓફિસે હતો. ત્યારે કંપનીમાં કામ કરતા સુપરવાઈઝર અધિકારી યુવરાજસિંહ જાડેજાએ બોલાવી તું કેમ ફિલ્ડમાં જતો નથી? અને જાય છે તો સાંજ સુધી પાછો આવતો નથી, તારો સામો જવાબ દેવાનો એટીટ્યુડ કાઢી નાખજે કહી ગાળો આપી રાઠોડ એટલે કઈ જ્ઞાતિનો? યુવકે વણકર કહેતા જ્ઞાતિ પ્રત્યે અપમાનિત કરી જાપટ મારી બોચી પકડી લીધી હતી અને આજ તો તને મારી જ નાખવો છે કહી જાનથી મારી નાખવાની ધમકી આપતા ત્યાં હાજર અન્ય કમર્ચારીઓએ યુવાજરાજસિંહને પકડીને દૂર લઇ ગયા હતા. ત્યાં પણ ગાળો આપતા યુવક બહાર નીકળી ગાંધીગ્રામ પોલીસ મથકે પહોંચ્યો હતો. અને સુપરવાઈઝર અધિકારી સામે ફરિયાદ નોંધાવતા પોલીસે ગુનો નોંધી આગળની કાર્યવાહી હાથ ધરી છે.