ભરૂચના બ્લ્યુશીપ કોમ્પલેક્ષમાં આવેલી આર.કે. સિનેમા ટોકીઝમાં ગઈકાલે રાત્રે એક વિવાદિત ઘટના સામે આવી હતી. બોલિવૂડ ફિલ્મ ‘છાવા’નો શો ચાલી રહ્યો હતો, ત્યારે એક યુવકે અચાનક હોબાળો મચાવ્યો હતો અને સિનેમાના સ્ક્રીનનો પડદો ફાડી નાખ્યો હતો. ઈમોશન થઈને હીરો વિકી કૌશલને બાંધી દેવાતા ક્રોધ ભરાઈને દારૂ પીધેલા યુવકે પડદો ફાડી નાખ્યો હતો. આ મામલે એ ડિવિઝન પોલીસે ગુનો નોંધીને વધુ તપાસ હાથ ધરી છે.

પોલીસ તપાસમાં સામે આવ્યું કે, આરોપી જયેશ મોહનભાઈ વસાવા નામનો યુવક ફિલ્મ જોવા આવ્યો હતો. ચાલુ ફિલ્મ દરમિયાન તે અચાનક ઉશ્કેરાયો અને સ્ક્રીનના સ્ટેજ પર ચડી ગયો. થિયેટરમાં હાજર અન્ય પ્રેક્ષકોએ તેને રોકવાનો પ્રયાસ કર્યો અને બૂમાબૂમ કરી, પરંતુ યુવકે કોઈનું સાંભળ્યું નહીં અને પડદો ફાડવાનું ચાલુ રાખ્યું.

નશા કરવાનો ગુનો નોંધ્યો
આ મામલે થિયેટરના મેનેજરે ભરૂચ એ ડિવિઝન પોલીસ મથકમાં જાણ કરતાં જ પોલીસે સ્થળ પર પહોંચી જયેશ વસાવાની અટકાયત કરી હતી. ત્યારબાદ તેની સામે નશો કરવા બાબતે ફરિયાદ નોંધીને કાયદેસરની કાર્યવાહી હાથ ધરી છે. જોકે, જાણવા મળતી વિગતો મુજબ ફિલ્મમાં ઇમોશનલ સીન આવતા તે ભાવુક થઈ ગયો હતો અને તેણે થિયેટરનો પડદો ફાડ્યો હોવાનું જાણવા મળી રહ્યું છે. આ મામલે થિયેટર દ્વારા પડદા ચીરવાના નુકસાન અંગે ફરિયાદ નોંધાવશે.

વીડિયો સોશિયલ મીડિયામાં વાઈરલ
ઘટના દરમિયાન હાજર પ્રેક્ષકોએ આ સમગ્ર ઘટનાનો વીડિયો બનાવ્યો, જે સોશિયલ મીડિયા પર વાઈરલ થઈ ગયો છે. થિયેટરના મેનેજરે તુરંત જ ભરૂચ એ ડિવિઝન પોલીસને જાણ કરી, જેના પગલે પોલીસ ટીમ તાત્કાલિક ઘટનાસ્થળે પહોંચી હતી. પોલીસે આરોપી જયેશ વસાવાની અટકાયત કરી લીધી છે અને કાયદેસરની કાર્યવાહી શરૂ કરી છે. આ ઘટનાએ સિનેમાઘરમાં હાજર તમામ લોકોને ચોંકાવી દીધા હતા.