દિલ્હી પોલીસની ક્રાઈમ બ્રાન્ચે થ્રીલર ફિલ્મની કહાનીને પણ ટક્કર મારે તેવી વાસ્તવિક જિંદગી જીવતા ડોક્ટરની ધરપકડ કરી છે જે તબીબી જગત માટે તો લાંછનરૂપ છે જ, કોઈ ખૂંખાર ગુનેગાર પણ આવી ઘાતક હરકતો ન કરે તેટલી હદે પાશવી કૃત્યો આ તબીબે કર્યા છે.આ સીરીયલ કિલર આયુર્વેદિક ડૉક્ટર ટેક્સી ડ્રાઇવરોની હત્યા કરીને મગરોને ખવડાવતો હતો. ગુનાહિત જગતમાં તેને 'ડોક્ટર ડેથ' તરીકે ઓળખવામાં આવે છે. પોલીસે ધરપકડ કરેલા આરોપી દેવેન્દ્ર શર્મા પર હત્યા તેમજ કિડની રેકેટમાં સંડોવણીનો પણ આરોપ છે.

ગેરકાયદેસર રીતે 125 થી વધુ કિડની ટ્રાન્સપ્લાન્ટ કર્યા

તેના પર દિલ્હી, હરિયાણા, ઉત્તર પ્રદેશ અને રાજસ્થાનમાં 50 થી વધુ ટેક્સી ડ્રાઇવરોની હત્યા કરવાનો આરોપ છે, ઉપરાંત 1994 થી 2004 દરમિયાન ગેરકાયદેસર રીતે 125 થી વધુ કિડની ટ્રાન્સપ્લાન્ટ કર્યા હતા. પેરોલ પર ફરાર થયા પછી, દેવેન્દ્ર શર્મા રાજસ્થાનના દૌસામાં એક આશ્રમમાં પૂજારી તરીકે રહેતો હતો. પોલીસ આરોપીની પૂછપરછ કરી રહી છે અને તેના નેટવર્કની તપાસ કરી રહી છે.

અપહરણ અને લૂંટ સહિત 27 કેસ નોંધાયેલા છે

પોલીસે ધરપકડ કરાયેલો 67 વર્ષીય દેવેન્દ્ર શર્મા મૂળ યુપીના અલીગઢના રહેવાસી છે. તેની સામે હત્યા, અપહરણ અને લૂંટ સહિત 27 કેસ નોંધાયેલા છે. દિલ્હી, રાજસ્થાન અને હરિયાણામાં સાત અલગ અલગ કેસોમાં તેમને આજીવન કેદની સજા ફટકારવામાં આવી હતી. ગુડગાંવ કોર્ટે તેને ટેક્સી ડ્રાઈવરની હત્યાના કેસમાં મૃત્યુદંડની સજા પણ ફટકારી હતી. આરોપીએ 50 થી વધુ લોકોની હત્યા કર્યાની કબૂલાત કરી છે.

વર્ષ 2023 માં તિહાર જેલમાંથી પેરોલ મળ્યા બાદ તે ફરાર થઈ ગયો હતો

તેની સામે અનેક ગુનાઓ જાહેર થયા પછી 2004 માં તેની પત્ની અને બાળકોએ તેને છોડી દીધો. વર્ષ 2023 માં તિહાર જેલમાંથી પેરોલ મળ્યા બાદ તે ફરાર થઈ ગયો હતો, ત્યારથી પોલીસ તેને શોધી રહી હતી. ક્રાઈમ બ્રાન્ચ અલીગઢ, આગ્રા, પ્રયાગરાજ, જયપુર અને દિલ્હીમાં તેના છુપાયેલા સ્થળો અને નેટવર્ક પર નજર રાખી રહી હતી. એવું કહેવામાં આવ્યું હતું કે દેવેન્દ્ર શર્મા રાજસ્થાનના દૌસા સ્થિત એક આશ્રમમાં પૂજારી તરીકે છુપાયેલો હતો.

આ રીતે પોલીસે પાર પાડ્યું ઓપરેશન

યોજના મુજબ, એસીપી ઉમેશ બર્થવાલની ટીમ રાજસ્થાનના દૌસા સ્થિત આશ્રમમાં આરોપીને મળી, અને તે ટીમે અનુયાયી હોવાનો ડોળ શરુ કર્યો હતો . તે ડૉ. દેવેન્દ્ર શર્મા છે કે નહીં તે જાણવા માટે તેમને દેખરેખ હેઠળ રાખવામાં આવ્યા હતા. પુષ્ટિ થતાં, ટીમે તેને પકડી લીધો અને પૂછપરછ કરતાં, આરોપીએ તેના ગુનાહિત ભૂતકાળની કબૂલાત કરી અને કબૂલ્યું કે તે ક્યારેય જેલમાં પાછો ન ફરવાના ઇરાદાથી જ પેરોલ પર બહાર આવ્યો હતો.

આયુર્વેદિક ડોક્ટરની ડિગ્રી મેળવી

આરોપી દેવેન્દ્ર શર્માના પિતા, જે યુપીના અલીગઢના રહેવાસી છે, બિહારના સિવાનમાં એક દવા કંપનીમાં કામ કરતા હતા. ૧૯૮૪માં, શર્માએ બિહારમાંથી બેચલર ઓફ આયુર્વેદિક મેડિસિન એન્ડ સર્જરી ની ડિગ્રી મેળવી. સ્નાતક થયા પછી, તેમણે રાજસ્થાનના બાંદિકુઇમાં જનતા ક્લિનિક ખોલ્યું, જે તેમણે 11 વર્ષ સુધી ચલાવ્યું.

આ ગુનાઓ ૧૯૯૫ અને ૨૦૦૪ ની વચ્ચે આચરવામાં આવ્યા હતા.

અનેક કાળા કારનામામાં સંડોવણી

આરોપી દેવેન્દ્ર શર્મા ૧૯૯૫ થી ૨૦૦૪ દરમિયાન ગેરકાયદેસર ગેસ એજન્સી ચલાવવા, કિડની રેકેટ ચલાવવા અને ટેક્સી ડ્રાઇવરોના અપહરણ અને હત્યામાં સામેલ હતો. આરોપી, તેના સાથીઓ સાથે મળીને, ટેક્સી અને ટ્રક ડ્રાઇવરોની હત્યા કરતો હતો અને તેમના મૃતદેહ યુપીના કાસગંજમાં હજારા કેનાલમાં મગર પાસે ફેંકી દેતો હતો, જેથી કોઈ પુરાવા ન મળે. એવો આરોપ છે કે ૧૯૯૮ થી ૨૦૦૪ ની વચ્ચે, દેવેન્દ્ર, બીજા ડૉક્ટર અમિત સાથે મળીને ગેરકાયદેસર કિડની ટ્રાન્સપ્લાન્ટ રેકેટ ચલાવતા હતા. તેણે સ્વીકાર્યું કે તેણે ૧૨૫ થી વધુ ટ્રાન્સપ્લાન્ટમાં વચેટિયાની ભૂમિકા ભજવી હતી અને દરેક કેસમાં ૫ થી ૭ લાખ રૂપિયા લીધા હતા.