એકધારા હીટ વેવના કારણે છેલ્લા થોડા દિવસોથી જનજીવન ભારે પ્રભાવિત થયા પછી આખરે મહત્તમ તાપમાનમાં જોરદાર ઘટાડો થયો છે. બુધવારની સરખામણીએ ગુરુવારે કંડલા અને પોરબંદરમાં મહત્તમ તાપમાનનો પારો છ ડિગ્રી નીચે ઉતરી ગયો છે. જ્યારે રાજકોટમાં મહત્તમ તાપમાન અઢી ડિગ્રી જેટલું ઓછું થયું છે.

ગરમીના ઘટાડાની સાથે સાથ ગઈકાલ સાંજથી જ પવનની દિશા બદલાઈ હતી અને દરિયા તરફથી ભેજવાળા પવનો ફુકાવાનું શરૂ થયું હતું. આકાશમાં ભેજવાળા વાદળો પણ ગઈકાલે સાંજથી આજે સવારે જોવા મળ્યા છે. ભેજવાળા વાતાવરણના કારણે સંધ્યા ઢળતાની સાથે જ ગરમી અને લુ ની અસર બંધ થઈ ગઈ હતી અને પ્રમાણમાં ખુશનુમા વાતાવરણ રહ્યું હતું.

મોડી સાંજ થી સવાર સુધી આવું વાતાવરણ રહ્યા પછી સૂર્યોદય થતાની સાથે જ ફરી ગરમી શરૂ થઈ ગઈ છે. પરંતુ હીટ વેવ ન હોવાના કારણે સહન થઈ શકે તેવી ગરમીનો અનુભવ લોકો કરે છે. આજે સવારે અમરેલીમાં 72 ભુજમાં 78 દ્વારકામાં 84 ઓખામાં 80 પોરબંદરમાં 83 રાજકોટમાં 87 સુરતમાં 71 વેરાવળમાં 86 કંડલા અને નલિયામાં 78% ભેજ નોંધાયો છે.

ગુરુવારે ભુજમાં 40.2 કંડલા એરપોર્ટ પર 42.6 અમરેલીમાં 42.8 કેશોદમાં 40 રાજકોટ અને સુરેન્દ્રનગરમાં 43 અમદાવાદમાં 43.3 ડીસામાં 41.8 ગાંધીનગરમાં 43.2 વલ્લભ વિદ્યાનગરમાં 40.9 વડોદરામાં 40.8 ડીગ્રી મહત્તમ તાપમાન નોંધાયું હતું.

હવામાન ખાતાના જણાવ્યા મુજબ હજુ આગામી બે થી ત્રણ દિવસ સુધીમાં મહત્તમ તાપમાનનો પારો ત્રણથી પાંચ ડિગ્રી જેટલો નીચે ઉતરશે અને તેના કારણે ગરમીમાં રાહત મળશે. પરંતુ ત્યાર પછી ફરી નવેસરથી ગરમીનો નવો રાઉન્ડ શરૂ થશે અને મહત્તમ તાપમાન નો પારો 42 થી 44 ડિગ્રી આસપાસ પહોંચી જશે.