લેધર આઈટમના નિકાસકાર અને ફિઓ (FIEO)ના પૂર્વ ચેરમેન રફીક અહમદ કહે છે કે સપ્ટેમ્બર-ઓક્ટોબર સુધીમાં તો નિકાસકારો બરબાદ થઈ જશે. અમેરિકાના ખરીદદારોએ અમારા જૂના ઓર્ડર પણ હાલ પૂરતા લેવાની ના પાડી દીધી છે. તેઓ અમને ઉત્પાદન પણ રોકવા માટે કહી રહ્યા છે. સરકારને આ મામલે અમેરિકા સાથે વાત કરીને સ્થિતિ સ્પષ્ટ કરવાની જરૂર છે.

ટ્રમ્પ સરકાર દ્વારા પારસ્પરિક શુલ્કની જાહેરાતની દૂરગામી અસર ભલે ગમે તે હોય, હાલમાં ગાર્મેન્ટ અને લેધર આઈટમ જેવા રોજગારલક્ષી ક્ષેત્રોમાં અમેરિકાથી મળનારા ઓર્ડર હોલ્ડ પર ગયા છે. નિકાસકારોના જણાવ્યા અનુસાર, અમેરિકન ખરીદદારોએ જૂના ઓર્ડરની ડિલિવરી પણ હાલ પૂરતી રોકવાનું કહ્યું છે.

નિકાસકાર અને આયાતકાર બંને સ્થિતિ સ્પષ્ટ થવાની રાહ જોઈ રહ્યા છે. ભારતીય નિકાસકારોને આશા છે કે સરકાર ભારત પર લગાવવામાં આવેલા 26 ટકાના પારસ્પરિક શુલ્કને લઈને અમેરિકાની સરકાર સાથે વાતચીત કરી શકે છે અને બંને દેશો વચ્ચે દ્વિપક્ષીય વેપાર કરાર (BTA) થાય ત્યાં સુધી તેને ટાળવાની વિનંતી કરી શકે છે.

વિયેતનામે ટેક્સ નાબૂદ કર્યો

બીજી તરફ વિયેતનામે પારસ્પરિક શુલ્કની જાહેરાત બાદ અમેરિકી વસ્તુઓ પર લાગતા શુલ્કને સંપૂર્ણપણે સમાપ્ત કરવાની જાહેરાત કરી છે. વિયેતનામ પર 46 ટકાનો પારસ્પરિક શુલ્ક લગાવવામાં આવ્યો હતો. હવે વિયેતનામને અમેરિકાથી શુલ્કમાં મોટી રાહત મળવાની આશા છે. એપેરલ એક્સપોર્ટ પ્રમોશન કાઉન્સિલે પત્ર લખીને સરકારને પારસ્પરિક શુલ્કને ટાળવા અંગે અમેરિકા સાથે વાતચીત કરવાની વિનંતી કરી છે.

આ બધાની વચ્ચે અમેરિકાના ખરીદદારો ભારતીય નિકાસકારો પાસેથી ડિલિવરી કિંમતમાં 10-26 ટકા સુધીની છૂટ માંગી રહ્યા છે. જો કે, ગાર્મેન્ટ અને લેધર સેક્ટરના ભારતીય નિકાસકારોનું કહેવું છે કે અમેરિકાના બજારમાં ઘણા દેશો સાથે ભારે સ્પર્ધા હોવાને કારણે અમે પહેલાથી જ ઓછા માર્જિન પર કામ કરીએ છીએ, તેથી અમેરિકન ખરીદદારોને છૂટ આપવાની કોઈ શક્યતા નથી.