વડાપ્રધાન નરેન્દ્ર મોદી પછી હવે યુપીના મુખ્યમંત્રી યોગી આદિત્યનાથના સંઘર્ષભર્યા જીવનની વાર્તા પડદા પર બતાવવામાં આવશે. યુપીના મુખ્યમંત્રીની બાયોપિક બનવા જઈ રહી છે. આ ફિલ્મનું નામ 'અજય: ધ અનટોલ્ડ સ્ટોરી ઓફ અ યોગી' છે. ફિલ્મનું પહેલું પોસ્ટર અને ટીઝર પણ રિલીઝ થઈ ગયું છે એ જોઇને ચાહકો ફિલ્મ પ્રત્યે ઉત્સાહિત છે.

'અજેય: ધ અનટોલ્ડ સ્ટોરી ઓફ અ યોગી' શાંતનુ ગુપ્તાના પુસ્તક 'ધ મોન્ક હુ બિકમ ચીફ મિનિસ્ટર' પરથી પ્રેરિત છે. તે ડ્રામા, ઈમોશન, એક્શન અને બલિદાનની વણકહી વાર્તા દર્શાવશે. ફિલ્મનું મોશન પોસ્ટર રિલીઝ કરતા, પ્રોડક્શન હાઉસે સોશિયલ મીડિયા પર કેપ્શનમાં લખ્યું છે - 'તેમણે બધી વસ્તુનો ત્યાગ કર્યો પરંતુ જનતાએ તેમને પોતાના બનાવી લીધા.'

અભિનેતા અનંત જોશીએ 'અજય: ધ અનટોલ્ડ સ્ટોરી ઓફ અ યોગી'માં સીએમ યોગી આદિત્યનાથની ભૂમિકા ભજવી છે. ફિલ્મના પહેલા લુકમાં, તે યોગી આદિત્યનાથની જેમ જ ભગવા વસ્ત્રો પહેરેલો જોવા મળે છે. ગઈકાલે આ ફિલ્મનું મોશન પોસ્ટર પણ રિલીઝ કરવામાં આવ્યું હતું, જે સ્પષ્ટ કરે છે કે આ ફિલ્મમાં સીએમ યોગીના બાળપણના જીવન, નાથપંથી યોગી બનવાના તેમના નિર્ણય, રાજકારણમાં પ્રવેશ અને મુખ્યમંત્રી બનવા સુધીની તેમની સફર દર્શાવવામાં આવશે.

2025 માં અનેક ભાષાઓમાં રિલીઝ થશે આ ફિલ્મ

રવિન્દ્ર ગૌતમ દ્વારા દિગ્દર્શિત  ફિલ્મ અજય- ધ અનટોલ્ડ સ્ટોરી ઓફ અ યોગીનું નિર્માણ રીતુ મેંગી દ્વારા કરવામાં આવ્યું છે. આ ફિલ્મ 2025 માં જ અનેક ભાષાઓમાં રિલીઝ થવા જઈ રહી છે. 'અજય: ધ અનટોલ્ડ સ્ટોરી ઓફ અ યોગી'માં અનંત જોશી ઉપરાંત પરેશ રાવલ, દિનેશ લાલ યાદવ 'નિરહુઆ', અજય મેંગી, પવન મલ્હોત્રા, ગરિમા સિંહ અને રાજેશ ખટ્ટર પણ મહત્વપૂર્ણ ભૂમિકાઓ ભજવતા જોવા મળશે.