સૂત્રો દ્વારા પ્રાપ્ત થયેલી માહિતી અનુસાર ઓલિમ્પિક 2036ની રમતો માટે સુવિધાઓ ઉભી કરવા માટેનો માસ્ટર પ્લાન તૈયાર થઈ રહ્યો છે. જેમાં મોટેરામાં બળાત્કારના દોષિત આસારામના આશ્રમ સહિત ત્રણ આશ્રમોની જમીન સરદાર પટેલ સ્પોર્ટ્સ એન્ક્લેવ, ઓલિમ્પિક વિલેજ અને અન્ય રમતગમત સુવિધાઓ માટે સંપાદિત કરવામાં આવશે, જે મોટેરા ખાતે હાલના નરેન્દ્ર મોદી સ્ટેડિયમ નજીક આશરે 650 એકર જમીન પર બનશે. 

ટોચના સૂત્રોએ જણાવ્યું હતું કે આસારામ આશ્રમ, ભારતીય સેવા સમાજ અને સદાશિવ પ્રજ્ઞા મંડળ નામના ત્રણ આશ્રમોને સ્થાનાંતરિત કરવામાં આવે તેવી શક્યતા છે. સૂત્રોએ જણાવ્યું હતું કે આ જમીન સંપાદન કરવાની અને ત્રણેય ટ્રસ્ટોને વૈકલ્પિક જગ્યાઓ પૂરી પાડવાની પ્રક્રિયા ચાલી રહી છે. અમદાવાદ મ્યુનિસિપલ કમિશનર, અમદાવાદ જિલ્લા કલેક્ટર અને એયુડીએના સીઈઓ સહિત ત્રણ સભ્યોની સમિતિએ માસ્ટર પ્લાન માટે જમીન સંપાદન પ્રક્રિયા શરૂ કરી છે.
 
આસારામ આશ્રમ, ભારતીય સેવા સમાજ અને સદાશિવ પ્રજ્ઞા મંડળના સંદર્ભમાં કલેક્ટર કચેરી કાયદા અનુસાર બાકી રહેલી કાર્યવાહી પૂર્ણ કરશે. લેન્ડ પાર્સલ ફાઇનલાઇઝેશન કમિટી બાંધકામો માટે વૈકલ્પિક જમીન અથવા વળતર આપવાનો નિર્ણય લેશે. સૂત્રોએ જણાવ્યું કે સદાશિવ પ્રજ્ઞા મંડળે તેમના વર્તમાન સ્થાનો પર માળખાં જાળવી રાખવા વિનંતી કરી છે. માસ્ટર પ્લાનમાં આને સમાવી શકાય છે, જે અન્ય જમીનના પાર્સલ સોંપવામાં સહકારને આધીન છે.

સ્ટેડિયમની નજીકના શિવનગર અને વણઝારા વાસ જેવા રહેણાંક વિસ્તારોનો પણ માસ્ટર પ્લાનમાં સમાવેશ કરવામાં આવ્યો છે. 20 ફેબ્રુઆરી, 2025 ના રોજ મુખ્યમંત્રી ભૂપેન્દ્ર પટેલની આગેવાની હેઠળની સમિતિએ નિર્ણય લીધો કે અમદાવાદ મ્યુનિસિપલ કોર્પોરેશન (એએમસી) કબજેદારોને સ્થાનાંતરિત કરશે. અમદાવાદ કલેક્ટર કચેરીને સંપાદન પ્રક્રિયાનું કામ સોંપવામાં આવ્યું છે.

એયુડીએના સૂત્રોના જણાવ્યા અનુસાર એક આંતરરાષ્ટ્રીય કન્સલ્ટન્સી એજન્સી, પોપ્યુલસ સરદાર પટેલ સ્પોર્ટ્સ એન્ક્લેવ અને ઓલિમ્પિક વિલેજ માટે માસ્ટર પ્લાન તૈયાર કરી રહી છે. એજન્સીએ માસ્ટર પ્લાન માટે જમીન પસંદ કરી છે અને પ્રારંભિક અહેવાલ તૈયાર છે. આ યોજનામાં ભાટ, મોટેરા, કોટેશ્વર અને સુઘાડમાં 600 એકર, સાબરમતી રિવરફ્રન્ટ પર 50 એકર એમ કુલ 650 એકરનો સમાવેશ થાય છે. માસ્ટર પ્લાનમાં કરાઈ પોલીસ એકેડેમીની જમીનનો પણ સમાવેશ થાય છે. સલાહકાર એજન્સીએ સાબરમતી રિવરફ્રન્ટના ફેઝ 2 ની જમીનને યોજનામાં સમાવિષ્ટ કરી છે. આ એન્ક્લેવ નરેન્દ્ર મોદી સ્ટેડિયમની આસપાસ 280 એકર અને રિવરફ્રન્ટ પર 50 એકર પર સ્થાપિત કરવામાં આવશે, જ્યારે ઓલિમ્પિક વિલેજ ભાટ અને સુઘાડમાં 240 એકર પર સ્થાપિત કરવામાં આવશે. કરાઈ એકેડેમીની જમીન માટે રમતગમતની સુવિધાઓનું પણ આયોજન કરવામાં આવ્યું છે.

એયુડીએના સૂત્રો જણાવે છે કે નરેન્દ્ર મોદી સ્ટેડિયમની આસપાસની જમીન નિર્ધારિત થઈ ગઈ  છે અને સંપાદિત થનારી જમીન સહિત પ્રારંભિક માસ્ટર પ્લાન તૈયાર છે. વધુમાં સૂત્રોએ જણાવ્યું કે ટીપી સ્કીમ દ્વારા ખાનગી પ્લોટ સંપાદિત કરવામાં આવશે અને રાજ્ય દ્વારા આપવામાં આવેલી લીઝ પરની જમીનો, જેમાં ત્રણ આશ્રમોનો પણ સમાવેશ થાય છે એ પાછી લેવામાં આવશે. આ આશ્રમો માટે વૈકલ્પિક જગ્યાઓ પૂરી પાડવાનો મુદ્દો વિચારણા હેઠળ છે.