ભરૂચના ઝઘડિયા જીઆઈડીસીમાં 10 વર્ષની બાળકીનું અપહરણ કરી દુષ્કર્મ આચરી તેની ઘાતકી હત્યા કરવામાં આવી હતી. આ કેસમાં આજે આરોપી વિજય પાસવાનને કોર્ટે ફાંસીની સજા સંભળાવી છે. 

પ્રાપ્ત વિગત મુજબ, ભરૂચના ઝઘડિયા GIDCમાં 16 ડિસેમ્બર 2024માં 10 વર્ષની બાળકીના અપહરણ, દુષ્કર્મ અને ઘાતકી હત્યાનો બનાવ બન્યો હતો.

8 દિવસની સારવાર બાદ બાળકીનું મોત

આ ઘટનામાં બાળકી 8 દિવસ સુધી સારવાર હેઠળ રહી, પરંતુ અંતે તેનું મૃત્યુ થયું હતું. આ દુષ્કર્મના કિસ્સામાં, આરોપીએ એક મહિના પહેલા પણ આ જ માસૂમ સાથે દુષ્કર્મ આચર્યું હતું, પરંતુ માતા-પિતાની ચુપ્પીએ આ દીકરીને મોતના મુખમાં ધકેલી દીધી હતી.

પોલીસ સમક્ષ ક્રૂર કબૂલાત કરી હતી

હા...સાહેબ... પહેલાં મેં રેપ કર્યો, પછી હત્યા કરી હતી. આ ક્રૂર કબૂલાત ભરૂચના ઝઘડિયા GIDCમાં 10 વર્ષની બાળકી પર રેપ ગુજારનાર હેવાને આપી હતી. એ હેવાન વિજય પાસવાનને તો પોલીસે 16 ડિસેમ્બર 2024માં ગણતરીના કલાકોમાં જ તેના ઘરેથી ઝડપી લીધો હતો, પણ તેની હેવાનિયત સાંભળીને પોલીસના પણ રૂંવાડાં ઊંભાં થઈ ગયાં હતાં. તો માસૂમે 8 દિવસના સારવાર બાદ મોતને ભેટી હતી. ત્યારે જિંદગીનો જંગ હારેલી બાળકીને કોર્ટે ન્યાય આપ્યો છે અને ચાર્જશીટના 72 દિવસમાં આરોપીને કોર્ટે ફાંસીની ફટકારી છે.