કુતિયાણા ગામે બે શખ્શોએ લાકડાના ધોકા વડે યુવાન ઉપર ઘાતક હુમલો કરતા પોલીસ ફરિયાદ નોંધાઇ છે.
કુતિયાણાના ચકલાપરામાં રહેતા અને મજૂરી કામ કરતા કેમન પ્રતાપ ઠક્કર નામના યુવાને એવી પોલીસ ફરિયાદ નોંધાવી છે કે તે કુતિયાણાના ટાવરચોકમાં પાન માવો ખાઇને શાકમાર્કેટ જતો હતો ત્યારે તેના જ લતામાં રહેતા ધર્મેશ રણછોડ પરમાર અને ઉમેશ રણછોડ પરમાર બંને જણા લાકડાના ધોકા લઇને આવી પહોચ્યા હતા અને કેમનને કહેવા લાગ્યા હતા કે ‘તારા ઘરના સભ્યો અમારી સાથે કેમ અગાઉ ઝઘડો કરતા હતા?’ આથી ફરીયાદીએ જણાવ્યુ હતુ કે તમે લોકો સાંજે અમારા ઘર તરફ લાઇટબતીઓ મારતા હતા તેથી મારા પિતા પ્રતાપભાઇએ તમને ઠપકો આપ્યો હતો. આવુ કહેતા બંને ઉશ્કેરાઇ ગયા હતા અને ગાળો દઇ કેમનને આડેધડ માર મારવા લાગ્યા હતા. લોકોનુ ટોળુ એકત્ર થઇ જતા એ બંને ઇસમોએ ‘આજે તો તુ બચી ગયો પરંતુ હવે ફરી આડો આવીશ તો મારી નાખશુ’ એવી ધમકી આપી જતા રહ્યા હતા. ઘવાયેલા કેમનને સારવાર માટે ૧૦૮ મારફતે કુતિયાણા અને ત્યાંથી વધુ સારવાર માટે પોરબંદરની ભાવસિંહજી હોસ્પિટલે લવાયા બાદ ગુન્હો દાખલ થયો છે.