નાસાના શક્તિશાળી જેમ્સ વેબ સ્પેસ ટેલિસ્કોપ એ તાજેતરમાં કુખ્યાત "સિટી-કિલર" એસ્ટરોઇડ 2024 વાયઆર4 જોયો છે. આ મુજબ, તે ડિસેમ્બર 2032 માં પૃથ્વી અને ચંદ્રની ખતરનાક રીતે નજીકથી પસાર થવાનું છે. પૃથ્વી સુરક્ષિત છે, પરંતુ ચંદ્ર જોખમમાં હોઈ શકે છે.જેમ્સ વેબ સ્પેસ ટેલિસ્કોપ એ 2024 વાયઆર4 નું અવલોકન કર્યું અને જોયું કે તે અગાઉના અંદાજ કરતાં મોટું અને પથ્થરવાળું હોઈ શકે છે. સારા સમાચાર એ છે કે તે હવે પૃથ્વી માટે ખતરો નથી, પરંતુ ચંદ્ર સાથે અથડાવાની શક્યતા હજુ પણ રહે છે. સંશોધકોએ તેમના પ્રારંભિક અહેવાલમાં લખ્યું છે કે, 22 ડિસેમ્બર, 2032 ના રોજ 2024 વાયઆર4ની પૃથ્વી સાથે અથડામણની શક્યતા હવે નકારી કાઢવામાં આવી છે, પરંતુ આ સમયે ચંદ્ર સાથે અથડાવાની તેની સંભાવના હજુ પણ શૂન્ય નથી.​​​​​​​

તેની અસર 500 હિરોશિમા બોમ્બ જેટલી થઈ શકે
જેમ્સ વેબ સ્પેસ ટેલિસ્કોપ મે 2025 માં ફરીથી તેનું અવલોકન કરશે. આગામી ઘણા વર્ષો સુધી એસ્ટરોઇડ બાહ્ય સૌરમંડળમાં અદૃશ્ય થઈ જાય તે પહેલાં તે અંગે કોઈ નિશ્ચિત તારણ પર આવી જવાશે. ખગોળશાસ્ત્રીઓએ સૌપ્રથમ ડિસેમ્બર 2024 માં એસ્ટરોઇડ 2024 વાયઆર4 શોધ્યું હતું. જમીન-આધારિત ટેલિસ્કોપ દ્વારા પ્રારંભિક અવલોકનો દર્શાવે છે કે તેનો વ્યાસ લગભગ 180 ફૂટ (55 મીટર) હતો - લગભગ પીસાના લીનિંગ ટાવર જેટલો પહોળો તેનો વ્યાસ છે.

એસ્ટરોઇડ 2024 વાયઆર4 વિષે જાણવા જેવું
આ એસ્ટરોઇડનો માર્ગ ઘણીવાર પૃથ્વીના માર્ગને પાર કરે છે, જેના કારણે અથડામણની શક્યતા વધી જાય છે. જો તે અથડાશે, તો તે આખા શહેરનો નાશ કરી શકે છે, જે 500 હિરોશિમા બોમ્બ જેટલો છે. સંશોધકોએ અંદાજ લગાવ્યો હતો કે 2024 વાયઆર4 પૃથ્વી સાથે અથડાવાની 3.1% શક્યતા હતી, જે આ કદના પદાર્થ માટે સૌથી વધુ સંભાવના છે. બાદમાં નાસાએ તેને ઘટાડીને 0% કર્યું. અનિશ્ચિતતા વચ્ચે, જેમ્સ વેબ સ્પેસ ટેલિસ્કોપનો ઉપયોગ કરીને આ ખતરનાક અવકાશ ખડકનો અભ્યાસ કરવાનું નક્કી કર્યું.

ચંદ્ર સાથે અથડાવાની શક્યતા વધુ
જોન્સ હોપકિન્સ યુનિવર્સિટીના ખગોળશાસ્ત્રી અને રિપોર્ટના સહ-લેખક એન્ડ્રુ રિવકિને જણાવ્યું હતું કે, 2032 માં ચંદ્ર પર એસ્ટરોઇડ અથડાવાની શક્યતા હજુ પણ લગભગ 2% છે. જેમ્સ વેબ સ્પેસ ટેલિસ્કોપના ડેટા દર્શાવે છે કે 2024 વાયઆર4 પૃથ્વી માટે ખતરો નથી.

ચંદ્ર સાથે અથડામણ ભયાનક હોઈ શકે છે, પરંતુ તે પહેલા પણ ઘણી મોટી અસરોથી બચી ગયું છે. જો 2032 માં વાયઆર4 ચંદ્ર પર અથડાશે, તો તે સંશોધકો માટે એક અનોખી તક હશે, કારણ કે તેઓ વાસ્તવિક સમયમાં એક જાણીતા એસ્ટરોઇડને એક નવો ખાડો બનાવતો જોઈ શકશે.