રાજકોટમાં રમકડાના કારખાનામાં કામ કરતો એક 19 વર્ષનો યુવક અચાનક જ ઢળી પડ્યો હતો. જોકે હોસ્પિટલ પહોંચે એ પહેલા તેનું મોત નીપજ્યું હતું. હાલ પોલીસે મોતનું સાચું કારણ જાણવા મૃતદેહ પોસ્ટમોર્ટમ અર્થે ખસેડી જરૂરી કાર્યવાહી હાથ ધરી હતી, જેમાં પ્રાથમિક તારણમાં હાર્ટ-એટેકથી મોત થયાનું સામે આવ્યું છે. ઉલ્લેખનીય છે કે, મૃતક યુવાન મૂળ ઉત્તરપ્રદેશનો હોવાનું સામે આવ્યું છે. યુવક ઢળી પડ્યો તેના દૃશ્યો સીસીટીવીમાં કેદ થયા છે.

આજીડેમ પોલીસ સ્ટાફ હોસ્પિટલ આવી જરૂરી કાગળ કાર્યવાહી કરી

View this post on Instagram

A post shared by Aajkaal (@aajkaaldaily)

કારખાનામાં કાસ્ટિંગ પ્લાસ્ટિક લાઈન મોલ્ડિંગ મશીન પર કામ કરી રહ્યો હતો

મૃતકનાં પરિવારજનોએ પોલીસને જણાવ્યું હતું કે અતુલકુમાર ગોંડલ ચોકડી પાસે આવેલી રમકડાં બનાવતી ફ્લેક્સ ઝોન નામની કંપનીમાં કામ કરતો હતો. તે આશરે 10 મહિનાથી આ કંપનીમાં કામે લાગ્યો હતો, જેમાં વચ્ચે થોડો સમય પોતાના વતન ઉત્તરપ્રદેશ ગયો હતો. ત્યાંથી પરત આવી 10 દિવસ પહેલાં જ કંપનીમાં ફરી કામે લાગ્યો હતો. ગઈકાલે રાત્રે આશરે 10 વાગ્યે અતુલકુમાર કારખાનામાં કાસ્ટિંગ પ્લાસ્ટિક લાઈન મોલ્ડિંગ મશીન પર કામ કરી રહ્યો હતો અને અચાનક બેભાન થઈ ઢળી પડ્યો હતો. જમીન પર પટકાતા તેને કપાળના ભાગે આંખ ઉપર સામાન્ય ઇજા પણ થઈ હતી. તુરંત જ તેને રાજકોટ સિવિલ હોસ્પિટલમાં બેભાન હાલતમાં ખસેડવામાં આવ્યો હતો. રાત્રે 11:30 વાગ્યા આસપાસ સારવાર દરમિયાન તેને મૃત જાહેર કરવામાં આવ્યો હતો.

મૃત્યુનું ચોક્કસ કારણ જાણવા પીએમ રિપોર્ટની રાહ જોવાઈ રહી છે

અતુલકુમાર બે ભાઈ, બે બહેનમાં ત્રીજા નંબરનો હતો. તેનું મૂળ વતન ઉત્તરપ્રદેશ છે. મૃતદેહને વતનમાં લઈ જવા તજવીજ કરાઈ હતી. પોલીસ સૂત્રોના જણાવ્યા મુજબ, અતુલકુમાર જ્યાં કામ કરતો હતો એ સ્થળના સીસીટીવી ફૂટેજ ચેક કરવામાં આવ્યા છે. તેના મૃત્યુનું ચોક્કસ કારણ જાણવા પીએમ રિપોર્ટની રાહ જોવાઈ રહી છે. પ્રાથમિક તારણ હાર્ટ-એટેકથી મોત થયાનું સામે આવ્યું છે.