ભાણવડ તાબેના રૂપામોરા વિસ્તારમાં ગતસાંજે એક સગર પરિવારની આશરે 10 વર્ષની બાળાને કૂતરાઓએ ફાડીખાધાનો કરુણ બનાવ સામે આવ્યો છે.

આ અરેરાટીજનક બનાવની જાણવા મળતી વિગત મુજબ ભાણવડ તાલુકાના રૂપામોરા વિસ્તારમાં રહેતા હીરાભાઈ પીપરોતર નામના એક સગર આસામીની આશરે 10 વર્ષની પુત્રી પુરીબેન ગઈકાલે આશરે ચારેક વાગ્યાના સમયે તેમના ઘર નજીકના વિસ્તારમાં રમતી હતી. ત્યારે એકાએક ચાર-પાંચ જેટલા રખડું કુતરાઓ તેણી પર ત્રાટક્યા હતા. આ ખૂંખાર કૂતરાઓએ બાળકી પર ઘાતક હુમલો કરતા તેણીને લોહી લુહાણ હાલતમાં ભાણવડની સરકારી હોસ્પિટલમાં ખસેડવામાં આવી હતી. જ્યાં ફરજ પરના તબીબોએ તેણીને મૃત્યુ પામેલી જાહેર કરી હતી.

આ બનાવથી નાના એવા રૂપામોરા વિસ્તારમાં ભયનો માહોલ પ્રસરી ગયો હતો. આ કરુણ ઘટનાથી મૃતક બાળાના પરિવારજનોમાં ઘેરા શોકની લાગણી પ્રસરી જવા પામી છે.