રાજકોટ શહેરના માધાપર ચોકડી પાસે નવી બની રહેલી મેરીગોલ્ડ બાંધકામની સાઈટની લિફ્ટના ખાંચામાં પડી જતા શ્રમિક યુવકનું મોત નીપજ્યું હતું. ઘટનાના પગલે યુવકના પરિવારે પુત્રને કોઈએ ધક્કો મારતા પડી ગયો હોવાનો આક્ષેપ કરતા પોલીસે તપાસ હાથ ધરી છે.

અચાનક લિફ્ટના ખાડામાં પડી ગયો

પ્રાપ્ત વિગત મુજબ હરિધવા માર્ગ પર સરદાર સોસાયટી-1માં રહેતો વિવેક દિલીપભાઈ રાઘવાણી (ઉ.વ.25)નો યુવક આજે સવારે 150 ફૂટ રિંગ રોડ પર માધાપર ચોકડી પાસે નવી બની રહેલી મેરીગોલ્ડ બાંધકામની સાઈટ પર લાદી કામ માટે ગયો હતો ત્યારે અચાનક લિફ્ટના ખાડામાં પડી જતા થાય કામ કરતા અન્ય શ્રમિકો સહિતના દોડી ગયા હતા અને ગંભીર હાલતમાં યુવકને સારવાર માટે સિવિલ હોસ્પિટલે ખસેડવામાં આવતા ફરજ પરના તબીબે મૃત જાહેર કર્યો હતો. 

પરિવારે આક્ષેપ કરતા પોલીસે તપાસ હાથ ધરી

બનાવની જાણ હોસ્પિટલ ચોકીના સ્ટાફે ગાંધીગ્રામ પોલીસને કરતા પોલીસ સ્ટાફે હોસ્પિટલ પહોંચી જરૂરી કાર્યવાહી કરી હતી. મૃતક બે ભાઇમાં નાનો અને અપરણિત હતો. બનાવના પગલે હોસ્પિટલએ મોટી સંખ્યામાં પરિવાજનો સહિતના ભેગા થઇ ગયા હતા અને પુત્રને કોઈએ ધક્કો માર્યો હોવાનો આક્ષેપ કરતા પોલીસે તપાસ હાથ ધરી છે.