સમાન્ય રીતે સ્વસ્થ રહેવા, વ્યક્તિને કસરત કરવાની અને યોગ્ય આહાર લેવાની સલાહ આપવામાં આવે છે. પરંતુ ભાગ્યે જ કોઈને ખબર હશે કે તમે વધુ પડતું વર્કઆઉટ સ્વાસ્થ્યને ફાયદાની જગ્યાએ નુકસાન પહોંચાડવા લાગે છે. વધુ પડતી કસરતનો જુસ્સો વ્યક્તિના સ્વાસ્થ્યને ઘણું નુકસાન પહોંચાડે છે. વધુ પડતું વર્કઆઉટ ન માત્ર રોગપ્રતિકારક શક્તિને નબળી પાડે છે પરંતુ હાડકાં અને માનસિક સ્વાસ્થ્યને પણ નુકસાન પહોંચાડે છે. 

વધુ પડતી કસરત કરવાના ગેરફાયદા : સ્વાસ્થ્ય નિષ્ણાતોના મતે વધુ પડતી કસરત કરવાથી સ્નાયુઓમાં ખેંચાણ અને અસહ્ય દુખાવો થઈ શકે છે. સખત કસરત કરવાથી સ્નાયુઓ સંપૂર્ણ રીતે સક્રિય થઈ જાય છે. જેના કારણે સ્નાયુઓમાં દુખાવો, સાંધામાં તણાવ, કમરનો દુખાવો વગેરે જેવી સમસ્યાઓ થઈ શકે છે.

વધુ પડતી કસરતને કારણે શરીરમાં હોર્મોનલ ઇમ્બેલેન્સ થવાનું જોખમ રહેલું છે. જેના કારણે વ્યક્તિ હંમેશા થાક અનુભવે છે. એટલું જ નહીં, વધુ પડતી કસરત માનસિક સ્વાસ્થ્ય માટે પણ હાનિકારક છે. વધુ પડતી કસરત કોર્ટિસોલનું સ્તર વધારે છે, જેના કારણે મન બેચેન થઈ જાય છે અને વ્યક્તિ તણાવ અનુભવવા લાગે છે.

જો તમને લાગે છે કે વધુ કસરત કરવાથી તમે ઝડપથી ફિટ થઈ જશો, તો તે તમારી ભૂલ છે.  વધુ પડતી કસરત કરવાથી બ્લડ પ્રેશર વધે છે, જે હૃદયના સ્વાસ્થ્યને નુકસાન પહોંચાડે છે. વધુ પડતા વર્કઆઉટને કારણે શરીર આરામ કરી શકતું નથી અને હ્રદય સામાન્ય દર કરતાં વધુ ઝડપથી ધબકે છે.

વધુ પડતી કસરત કરવાથી ઊંઘ ન આવવાની સમસ્યા થઈ શકે છે. વર્કઆઉટ દરમિયાન, એડ્રેનાલિન હોર્મોન શરીરમાંથી મુક્ત થાય છે, જે મૂડ સ્વિંગ અને ચીડિયાપણું સાથે ઊંઘ ન આવવા અને થાક જેવી સમસ્યાઓનું કારણ બને છે.

વધુ પડતા વર્કઆઉટ માત્ર શારીરિક સ્વાસ્થ્યને જ નહીં પરંતુ વ્યક્તિના માનસિક સ્વાસ્થ્યને પણ નુકસાન પહોંચાડે છે. વધુ પડતા વર્કઆઉટને કારણે વ્યક્તિને ચીડિયાપણું, ચિંતા, ડિપ્રેશન, ગુસ્સાની સાથે થાક અને શરીરમાં નબળાઈ જેવી સમસ્યાઓનો સામનો કરવો પડી શકે છે.

સેન્ટર ફોર ડિસીઝ કંટ્રોલ એન્ડ પ્રિવેન્શન અનુસાર, અઠવાડિયામાં 150 મિનિટ વર્કઆઉટ કરવું ફાયદાકારક માનવામાં આવે છે. તેને એક દિવસમાં કરવાને બદલે તેને અઠવાડિયાના 5 દિવસોમાં વહેંચવાથી વધુ ફાયદો થઈ શકે છે.