જાન્યુઆરી 2025માં માલ પરિવહન ખર્ચમાં 4%ના વધારાથી મોંઘવારી વધવાના અણસાર સાપડી રહ્યા છે.માલભાડાના વધતા ખર્ચને કારણે આગામી દિવસોમાં ફુગાવો વધી શકે છે. જાન્યુઆરી મહિનામાં ટ્રક ભાડામાં 4%નો વધારો થયો છે. એક અહેવાલ મુજબ, શિયાળાના ફળો અને શાકભાજીના આગમનને કારણે જાન્યુઆરી 2025માં દેશના મુખ્ય માર્ગો પર ટ્રક ભાડામાં સારો સુધારો થયો છે.
જાન્યુઆરી-માર્ચ ક્વાર્ટર સામાન્ય રીતે ખૂબ જ વ્યસ્ત સમયગાળો હોય છે, જેમાં રવિ પાક પછી કૃષિ પ્રવૃત્તિમાં વધારો થાય છે અને ઘણા ક્ષેત્રોમાં ઉત્પાદન પ્રવૃત્તિ પણ વધે છે. જો આપણે ટ્રક ભાડાની વાત કરીએ તો, દિલ્હી-મુંબઈ-દિલ્હી રૂટ પર ભાડામાં 4 ટકા, મુંબઈ-કોલકાતા-મુંબઈ રૂટ પર 3.7 ટકા અને દિલ્હી-હૈદરાબાદ-દિલ્હી અને કોલકાતા-ગુવાહાટી-કોલકાતા રૂટ પર માસિક ધોરણે 3.3 ટકાનો વધારો થયો છે.
અહેવાલ મુજબ, પ્રવૃત્તિમાં આ વધારાને કારણે ગયા મહિને માલવાહક વાહનો, કાર્ગો થ્રી-વ્હીલર્સ તેમજ પેસેન્જર બસો, મેક્સી કેબ્સ અને કૃષિ ટ્રેલર જેવા વાણિજ્યિક વાહનોના વેચાણમાં વધારો થયો. તેમાં કહેવામાં આવ્યું છે કે મહિના-દર-મહિનાના આધારે, જાન્યુઆરીમાં કાર્ગો વેચાણમાં 41 ટકાનો નોંધપાત્ર વધારો જોવા મળ્યો છે. ત્રણ પૈડાંવાળા વાહનો (માલ) અને પેસેન્જર બસોના વેચાણમાં 32 ટકાનો વધારો જોવા મળ્યો, જ્યારે મેક્સી કેબના વેચાણમાં 59 ટકાનો જંગી વધારો નોંધાયો. વધુમાં, રવિ પાક સિઝન દરમિયાન કૃષિ ટ્રેલરના વેચાણમાં 15 ટકાનો વધારો થયો હતો, જ્યારે મોટર કારના વેચાણમાં 54 ટકા અને ટુ-વ્હીલરના વેચાણમાં 27 ટકાનો વધારો જોવા મળ્યો હતો.ઇલેક્ટ્રિક વાહન ક્ષેત્રમાં, ઈવી ટુ-વ્હીલરના વેચાણમાં ગયા મહિને 21 ટકાનો વધારો થયો હતો અને ઈવી કારના વેચાણમાં 16 ટકાનો વધારો થયો હતો.
રામ ફાઇનાન્સ લિમિટેડના મેનેજિંગ ડિરેક્ટર અને ચીફ એક્ઝિક્યુટિવ ઓફિસર વાય એસ ચક્રવર્તીએ જણાવ્યું હતું કે, ભાડા દરમાં વધારો લોજિસ્ટિક્સ ક્ષેત્ર માટે સકારાત્મક સંકેત છે. આ વધારો શિયાળાના ફળો અને શાકભાજીના આગમનને આભારી હોઈ શકે છે, જેના કારણે પરિવહન અને સંગ્રહ સેવાઓની જરૂરિયાત વધી છે. જો કે, દેશના મોટાભાગના ભાગોમાં પ્રવર્તતી શીત લહેરની સ્થિતિએ વાહનોની અવરજવર પર પ્રતિકૂળ અસર કરી છે, જેના કારણે પુરવઠા શૃંખલામાં કેટલાક વિક્ષેપો સર્જાયા છે, એમ તેમણે જણાવ્યું હતું.