મેટોડામાં હિટ એન્ડ રનની ઘટના સામે આવી છે. બાંધકામની સાઈટ પાસે રમતી બે વર્ષની બાળકીને કાર ચાલકે અડફેટે લેતા મોત નીપજ્યું હતું. અકસ્માત સર્જી કાર ચાલક નાસી છૂટતા શોધખોળ હાથ ધરવામાં આવી છે.

પ્રાપ્ત વિગત મુજબ મુળ મધ્‍યપ્રદેશના વતની હાલ જીઆઇડીસી ગેઇટ-૨માં વનરાજભાઇના ત્રણ માળના મકાનની બાંધકામની સાઇટ પર પરિવાર સાથે સાથે રહી મજૂરી કરતા થાનસિંગ વસુનીયા ગઇકાલે પત્ની સાથે સાઈટ ઉપર કામ કરતા હતા ત્યારે બે વર્ષની દિકરી દિવ્‍યા સાઇટ નજીક રમતી હતી ત્‍યારે કારના ચાલકે બાળકીને ઠોકરે લેતા ગંભીર ઇજાઓ થવાથી સિવિલ હોસ્‍પિટલમાં ખસેડાઇ હતી. પરંતુ જીવ બચી શક્યો નહતો. પુત્રીના મોતથી દંપતીમાં શોક છવાયો હતો. મૃતક દિવ્‍યા પાંચ બહેન અને એક ભાઇમાં સૌથી નાની હતી. બનાવ અંગે હોસ્‍પિટલ ચોકીના સ્ટાફે મેટોડા પોલીસને જાણ કરતાં પોલીસે જરૂરી કાર્યવાહી કરી હતી. અકસ્માત સર્જી નાશી છૂટેલા કારચાલકની પોલીસે તપાસ હાથ ધરી છે.